Երևանի ավագանու ընտրությունները ցույց տվեցին, որ հանրային վստահությունը քաղաքական գործընթացների նկատմամբ դեռևս ցածր է. ԵԽԽՎ համազեկուցող

Եվրոպայի խորհրդի Խորհրդարանական վեհաժողովի` Հայաստանի հարցով համազեկուցող Յուլյա Լյովոչկինան կոչ է արել Հայաստանի բոլոր քաղաքական ուժերին` լիարժեք կերպով հարգել ժողովրդավարական արժեքներն ու օրենքի գերակայությունը՝ ինչպես խոսքով, այնպես էլ գործով:

ԵԽԽՎ պաշտոնական կայքում տեղադրված հայտարարության մեջ մասնավորապես ասվում է. «Երևանի ավագանու ընտրությունները հստակ ցույց տվեցին հայ ժողովրդի ժողովրդավարական ձգտումները: Միաժամանակ, ընտրություններին մասնակցության թիվը ցույց տվեց, որ հանրային վստահությունը քաղաքական գործընթացների նկատմամբ դեռ ցածր է: Հետևաբար, անչափ կարևոր է, որպեսզի հաջորդ խորհրդարանական ընտրությունները  բոլոր քաղաքական մրցակիցների և մասնակիցների կողմից ընկալվեն և ընդունվեն որպես ժողովրդավարական ու արդար: Թեև հասկանում ենք արտահերթ ընտրություններ անցկացնելու կոչը, մենք կոչ ենք անում իշխանություններին և, վստահաբար, բոլոր քաղաքական դերակատարներին` ապահովել, որ արտահերթ ընտրությունները լիարժեք կերպով համապատասխանեն ժողովրդավարական ընտրությունների եվրոպական չափանիշներին և նորմերին, և որ բոլոր քաղաքական ուժերը պատշաճ ու բավարար ժամանակ ունենան այդ ընտրություններին պատրաստվելու համար: Սա հատկապես կարևոր է, եթե Ընտրական օրենսգիրքն իսկապես փոխվի, ինչպես որ ցանկանում են որոշ քաղաքական դերակատարներ»:

Հայտարարության մեջ առանաձնահատուկ կերպով շեշտվել է, որ ցանկացած փոփոխություն պետք է լիարժեք կերպով համապատասխանի Վենետիկի հանձնաժողովի ցուցումներին, գլխավորաբար այն հատվածով, որը վերաբերում է ընտրական օրենսդրության կայունությանը, և հիմնված լինի հնարավորինս շատ քաղաքական ուժերի կոնսենսուսի վրա:

Լյովոչկինայի խոսքով` պատշաճ խորհրդակցությունների և կոնսենսուսի կառուցման համար բավարար ժամանակ ունենալը հատկապես կարևորվում է սահմանադրական ցանկացած հնարավոր փոփոխությունների համատեքստում, որոնք չպետք է ընդունվեն հապշտապ:

Ինչ վերաբերում է Հայաստանում տեղի ունեցած վերջին զարգացումներին՝ Լյովոչկինան կրկնել է, որ իրենք բազմիցս ողջունել են Հայաստանում խաղաղ և ժողովրդավարական իշխանափոխությունը, այդ թվում` իշխանությունների հավաստիացումներն առ այն, որ ժողովրդավարական սկզբունքները պետք է լիարժեք կերպով հարգվեն, նաև` որ արդարադատությունը պետք է գործի առանց քաղաքական միջամտության՝ դրանով իսկ զերծ մնալով ցանկացած քաղաքական ազդեցությունից:

«Ես ընդգծում եմ, որ չի կարող լինել անպատժելիություն քրեական գործողության համար` անկախ այն բանից, թե ով է դա գործել: Հետևաբար, մենք ողջունում ենք ցանկացած արժանահավատ քննություն 2008թ. մարտին տեղի ունեցավ ողբերգական իրադարձությունների 10 զոհերի գործով: Այնուամենայնիվ, ցանկացած քննություն, այդ թվում` կոռուպցիոն մեղադրանքների վերաբերյալ, պետք է իրականացվի օրենքի գերակայության, դատական համակարգի անկախության և արդար դատավարության սկզբունքներին խստորեն հավատարիմ մնալու պայմաններում՝ համաձայն Մարդու իրավունքների եվրոպական կոնվենցիայի»,- ասել է նա:

Նշենք, որ, ըստ հաղորդագրության, ԵԽԽՎ համազեկուցողները Հայաստան կայցելեն մոտ ապագայում: