Առաջընթաց չտեսնելը չկամություն է. Վահրամ Բաղդասարյանը՝ Սվիտալսկու հայտարարության մասին

Այսօր Հայաստանում ԵՄ պատվիրակության ղեկավար, դեսպան Պյոտր Սվիտալսկին  «Ընտրական զարգացումները Հայաստանում, քաղված դասերը և հետագա քայլերը» թեմայով համաժողովի ժամանակ թեպետ նշել է, որ, հետխորհրդային մյուս  երկրների հետ համեմատած, Հայաստանում ընտրական գործընթացները շատ ավելի լավ վիճակում են, այդուհանդերձ, կան բացթողումներ: Մասնավորապես` եղել են ձայներ գնելու, ընտրակաշառք բաժանելու և սպառնալիքներ հնչեցնելու, ընտրությունն ուղղորդելու դեպքեր: Սվիտալսկին շեշտել է, որ ԿԸՀ-ն արժանահավատ կառույց չէ, և որ հարկավոր է նրա կազմը համալրել քաղաքացիական հասարակության ներկայացուցիչներով:

Սվիտալսկու այս դիտարկումների վերաբերյալ Yerkir.am-ի հետ զրույցում ԱԺ ՀՀԿ խմբակցության ղեկավար Վահրամ Բաղդասարյանը նշեց, որ ԿԸՀ-ն իր գործառույթները շատ պարտաճանաչ կատարել է և որևէ միջամտություն ո'չ ունեցել է, ո'չ էլ կարող էր ունենալ ընտրությունների ընթացքի վրա:

«Եթե եղել են ինչ-որ նեգատիվ երևույթներ, մենք դա պետք է հետագայում նկատի ունենանք, բայց այն առաջընթացը, որը մենք ունեցել ենք այս ընտրությունների ժամանակ, չնկատելը պարզապես կարող եմ համարել չկամություն»,- ասաց Բաղդասարյանը:

Նրա կարծիքով` ընտրական պրոցեսում լուրջ առաջընթացի վկայությունն է, որ ընտրությունների օրը որևէ վստահված անձի, հանձնաժողովի անդամի կողմից բողոք չի եղել, այլ միայն դիտորդներն են որոշ դիտարկումներ արել:

«Դրա վկայությունն  են նաև Սահմանադրական դատարան դիմած ՀԱԿ-ի երեք 3 կետերը, հետընտրական պրոցեսները, երբ որևէ քաղաքական ուժ որևէ բողոքի ակցիա չիրականացրեց»,- ասաց Բաղդասարյանը, ապա հավելեց, որ եթե լինեն առաջարկություններ ընտրական հանձնաժողովի փոփոխությունների հետ կապված, ապա մյուս ընտրությունների ժամանակ նկատի կունենան և կքննարկեն:

Բաղդասարյանն ընդգծեց, որ իրենք ուրախ են, որ միջազգային կառույցները բավականին հետևողական են: «Ընտրություններից առաջ մենք քննարկել ենք, բանակցել ենք և’ Վենետիկի հանձնաժողովի, և’ բոլոր միջազգային կառույցների հետ: Մեր շնորհակալությունն ենք հայտնում նրանց, որ հետևողական են և ուշադիր մեր քաղաքական զարգացումներին: Մենք ընդունում ենք նրանց դիտողությունները, բոլոր կարծիքները նկատի կունենանք հետագայում»,- շեշտեց պատգամավորը:

Նա նաև նշեց, որ սա մեր առաջին փորձն էր խորհրդարանական համակարգով ընտրություններ անցկացնելու, բայց թե' մեր հանրության և թե' միջազգային հանրության կարծիքները դրական էին: