Մտածեք՝ ինչպես կարող եք ԿԸՀ-ն դարձնել հանրային վստահություն վայելող կառույց. Պյոտր Սվիտալսկի

Հայաստանյան վերջին ընտրությունները ջրբաժան են լինելու, և արդեն հաջորդ ընտրություններն ավելի են գոհացնելու. այսօր «Ընտրական զարգացումները Հայաստանում, քաղված դասերը և հետագա քայլերը» թեմայով համաժողովի ժամանակ նշեց Հայաստանում ԵՄ պատվիրակության ղեկավար, դեսպան Պյոտր Սվիտալսկին՝ հավելելով, որ, հետխորհրդային մյուս  երկրների հետ համեմատած, Հայաստանում ընտրական գործընթացներն շատ ավելի լավ վիճակում են:

«Այստեղ հավաքվածներից ոչ մեկը չի կարող ասել, որ վերջին ընտրությունները Հայաստանում եղան կատարյալ, ամբողջ լրջությամբ հայտարարել, որ Հայաստանը հասել է այն մակարդակին, որը պետք է, հասել է ժողովրդավարական ստանդարտների կատարելությանը: Սա դեռևս գործընթաց է: Մենք կարող ենք ասել, որ ճանապարհի գրեթե կեսին ենք: Պահանջվեց 25 տարի, որ գնանք այդ նպատակի ուղղությամբ»,– ասաց նա: 

Անդրադառնալով խորհրդարանական ընտրությունների ընթացքին` Սվիտալսկին նշեց. «ԵՄ նախնական զեկույցում նշվել է, որ եղել են ձայներ գնելու, ընտրակաշառք բաժանելու և սպառնալիքներ հնչեցնելու, ընտրությունն ուղղորդելու դեպքեր: Բուժհաստատություններից մեկում հիվանդների փոխարեն քվեարկել են բժիշկները: Եղել են  դեպքեր, երբ մարդիկ ծեծի են ենթարկվել, նվաստացվել: Սրանք անընդունելի երևույթներ են, որոնք պետք է վերացվեն»:

ԵՄ պատվիրակության ղեկավարը նշեց, որ Հայաստանն ԸՕ-ի  քննարկման ընթացքում բավականին մեծ հաջողություն է գրանցել, քանի որ ընդդիմությունը և իշխող կոալիցիան որոշեցին նստել մեկ սեղանի շուրջ և քննարկել խնդիրները: «Բայց ուղերձը պետք է հստակ լինի: Կոնսենսուսը ԸՕ-ի  շուրջ ներառել է այդ օրենսգրքի սահմանափակ թվով կետեր: Կային կետեր, որ չընդունվեցին, դա, այսպես կոչված, ռեյտինգային ցուցակներն էին: Հայկական կողմը պետք է որոշի՝ արդյո՞ք այդ ցուցակները աշխատեցին, թե՞ ոչ: Սա բավականին լուրջ խնդիր է: Բոլոր կողմերը պետք է գնան կոմպրոմիսի, որ գտնեն լուծում: Ես ունեմ իմ սեփական կարծիքը դրա վերաբերյալ, ես համոզված եմ, որ բոլոր հայերը պետք է քննարկեն խնդիրը»,- ընդգծեց Սվիտալսկին:

Նրա խոսքով՝ հայերը կարիք ունեն խոր ժողովրդավարության և ազատության: «Երկու տարի Հայաստանում ապրելուց հետո համոզվել եմ՝ հայերը գենետիկորեն ուզում են ազատություն:  Նրանք բավականին քաջ են՝ պայքարելու իրենց ազատության համար` անկախ նրանից, թե որտեղ է գտնվում Հայաստանը լիբերալ-ժողովրդավարական պետություն դառնալու հարցում: Գիտեմ, որ ճանապարհը դյուրին չէ, բայց վստահ եմ, որ Հայաստանն ունի ապագա: Հայաստանը կունենա ավելի գոհացնող ընտրություններ»,- ասաց Սվիտալսկին: 

ԵՄ պատվիրակության ղեկավարը կարևորեց նաև հաստատությունների արժանահավատությունը: «Հայերի համար ի՞նչ է կարևոր՝ երեք բան՝ ԿԸՀ-ն, որը ոչ միայն արդյունավետ է, այստեղ հանրորեն ուզում եմ իմ մեծագույն գնահատականը ասել՝ ԿԸՀ-ի արդյունավետ աշխատանքի հետ կապված, բայց խնդիրը միայն արդյունավետությունը չէ, այլ արժանահավատությունը: Խոսքը միայն փաստերի մասին չէ, այլ ընկալումների: ԿԸՀ-ի կազմում պետք է ներգրավվեն քաղհասարակության ներկայացուցիչներ և այլն: Իմ խորհուրդն է հայերին՝ մտածեք, ուսումնասիրեք ԿԸՀ-ի կազմի խնդիրը, նաև այն, թե ինչպես կարող եք ԿԸՀ-ն դարձնել ավելի արժանահավատ և հանրային վստահություն վայելող կառույց»,- նշեց նա: