Գերմանիան դուրս կբերի իր զինծառայողներին թուրքական «Ինջիրլիք» ռազմաբազայից

Գերմանիայի ԱԳ նախարար Զիգմար Գաբրիելը երեկ հայտարարել էր, որ առաջիկա օրերին Գերմանիան իր զինծառայողներին դուրս կբերի թուրքական «Ինջիրլիք» ռազմաբազայի տարածքից:

Հիշեցնենք, որ երեկ Գերմանիայի ԱԳ նախարարի` Թուրքիա այցի ընթացքում երկրի ԱԳ նախարարությունը հայտարարել էր, որ Թուրքիան հավատարիմ է իր որոշմանը ու չի թույլատրի գերմանացի պաշտոնյաներին «Ինջիրլիք» ավիաբազա այցելել: Որոշումից հետո Թուրքիայի վարչապետ Յըլդըրըմը հետաձգել էր իր առանձին հանդիպումը գերմանացի նախարարի հետ:

Ըստ BBC News-ի՝ Գաբրիելը հայտնել է, որ Գերմանիայի խորհրդարանը խնդրի վերաբերյալ գրավոր հարցում կուղղի երկրի կառավարությանը: Հավանության արժանանալու դեպքում Գերմանիան դուրս կբերի իր զինծառայողներին Թուրքիայից: Գերմանիայի խորհրդարանը այդ որոշումը կստորագրի հունիսի 19-ին:

Հիշեցնենք նաև, որ Թուրքիայի նախագահ Էրդողանը հայտարարել էր, որ Թուրքիան պատրաստ է «հրաժեշտ տալ Գերմանիային, եթե Բեռլինը որոշի հետ կանչել իր զինվորականներին «Ինջիրլիք» թուրքական ռազմաբազայից»: