Հայաստանը չի կարողանա միակողմանիորեն հրաժարվել 102-րդ ռուսական ռազմաբազայից մինչև 2044 թվականը

Հայաստանը չի կարողանա միակողմանիորեն հրաժարվել Գյումրիում տեղակայված 102-րդ ռուսական ռազմաբազայից մինչև 2044 թվականը, պարզել է «Իզվեստիա»-ն՝ ուսումնասիրելով Ռուսաստանի Դաշնության և Հայաստանի Հանրապետության միջև՝ ՀՀ-ում ռուսական ռազմականի մասին 1995 -ին կնքված պայմանագիրը։ 
Այս տեղեկությունը հաստատել են Պետդումայում, գրում է «Իզվեստիա»-ն։

Այսպես, համապատասխան փաստաթղթի 27-րդ հոդվածում ասվում է. «Եթե կողմերից մեկը հայտարարում է սույն պայմանագիրը խզելու իր մտադրության մասին, ռուսական ռազմակայանի լուծարման հետ կապված հարցերը լուծվում են խառնակազմ հանձնաժողովի կողմից։ Ռուսական ռազմակայանի լուծարումը պետք է ավարտվի կողմերի միջեւ համաձայնեցված ժամկետում»։

2010 թվականին Ռուսաստանի և Հայաստանի նախագահներ Դմիտրի Մեդվեդևի և Սերժ Սարգսյանի կողմից ստորագրված ռուսական բազայի մասին համաձայնագրի թիվ 5 արձանագրության համաձայն՝ Հայաստանի տարածքում դրա գտնվելու ժամկետը երկարացվել է մինչև 2044 թվականը։
Այս տեղեկությունը «Իզվեստիա»-ին հաստատել է Պետդումայի պաշտպանության կոմիտեի փոխնախագահ Յուրի Շվիտկինը։

«Համաձայն Ռուսաստանի Դաշնության և Հայաստանի Հանրապետության միջև կնքված պայմանագրի, պայմանագրի գործողության ժամկետը լրանալուց հետո այն ավտոմատ կերպով երկարաձգվում է հաջորդ հինգ տարի ժամկետով, եթե կողմերից որևէ մեկը պայմանագրի գործողության հերթական ժամկետը լրանալուց առնվազն վեց ամիս առաջ դրա դադարեցման մտադրության մասին գրավոր չծանուցի պայմանագրի մյուս կողմին: Այս համաձայնագրի դրույթները կարող են վերանայվել կողմերից մեկի նախաձեռնությամբ և փոխադարձ համաձայնությամբ»,- «Իզվեստիա»-ին ասել է Շվիտկինը։

Հիշեցնենք՝ նախօրեին ՀՀ վարչապետ Նիկոլայ Փաշինյանը The Wall Street Journal-ին տված հարցազրույցում ասել էր, որ Երևանը «առավելություններ չի տեսնում» Հայաստանի տարածքում ռուսական ռազմաբազա ունենալու հարցում, բայց միևնույն ժամանակ ընդգծել է, որ Ռուսաստանը և Հայաստանը չեն քննարկում հանրապետությունից ռուս զինվորականների դուրսբերման հարցը։