Մենք միշտ էլ իրատեսական ենք գնահատում իրավիճակը. Մելքումյանը՝ ԱԺ նախագահի իրենց թեկնածուն չառաջադրելու մասին

Շարունակվում է  6-րդ գումարման ԱԺ-ի անդրանիկ նիստը: Այս պահին պատգամավորներն ընտրում են ԱԺ նախագահին: Հիշեցնենք` թեկնածուները երկուսն են՝ հանրապետական Արա Բաբլոյանը և «Ելք»-ից Էդմոն Մարուքյանը:

Քվեարկության ընթացքում լրագրողները «Ծառուկյան» դաշինքի պատգամավոր Միքայել Մելքումյանից հետաքրքրվեցին` «Ծառուկյան» դաշինքն ո՞ւմ օգտին կքվեարկի: Նա ասաց, որ որոշում չկա այս պահին, ով ինչպես ուզի, այնպես էլ կքվեարկի:

Հարցին՝ ինքը հանուն ինչի՞ է քվեարկել, Մելքումյանն արձագանքեց. «Հանուն արդյունավետ պառլամենտարիզմի զարգացման, որպեսզի պառլամենտը իսկապես կենսունակ մարմին դառնա: Պառլամենտում էլ շատ խնդիրներ կան, այնպես որ` ես քվեարկել եմ, որպեսզի փոփոխություն լինի»:

Իսկ հարցին՝ ինչո՞ւ «Ծառուկյան» դաշինքը ԱԺ նախագահի թեկնածու չառաջարկեց, պատգամավորը պատասխանեց, որ իրենք այդպես են որոշել: «Թեկնածուներ միշտ էլ կան: Կարող ենք առաջարկել, բայց մենք միշտ էլ իրատեսական ենք գնահատում իրավիճակը և ռեալ քայլեր պետք է անենք: Սա քաղաքական որոշում է, ինքնանպատակ չպետք է լինի»,- նշեց նա:

Իսկ ո՞ւմ է ընտրել Մելքումյանը: Նա ասաց, որ գաղտնիք է:

Ի դեպ, Yerkir.am-ի հարցին` արդյո՞ք ընտրելու են ԱԺ նախագահի ընդդիմադիր թեկնածուին, «Ծառուկյան» դաշինքի ևս մեկ անդամ` Վահե Էնֆիաջյանը, նույնպես պատասխանեց, թե գաղտնիք է: