Մենք խնդիր չունենք վարչապետի հետ. Լեւոն Մկրտչյան

Այսօր Հաղթանակի զբոսայգում լրագրողների հետ զրույցում կրթության և գիտության նախարար Լևոն Մկրտչյանը պատասխանեց լրագրողների հարցերին:

Հարցին` Կարեն Կարապետյանը դժվարանո՞ւմ է ձեզ հետ աշխատել, Մկրտչյանն արձագանքեց. «Ես չեմ դժվարանում»:  Ճշտող հարցին` նա ցանկանո՞ւմ է Ձեզ հետ աշխատել, պատասխանեց. «Ես այդպիսի տեղեկություններ չունեմ»:

Անդրադառնալով վարչապետի հետ աշխատանքային հարաբերություններին` նա նշեց, որ նորմալ աշխատանքային հարաբերություններ ունեն, ապա ասաց. «Դուք գիտեք, որ մի քանի օր առաջ վարչապետը մեզ մոտ էր»:

Լևոն Մկրտչյանը նաև նշեց, որ դեռ չգիտի` արդյո՞ք կլինի նոր կառավարությունում: Հարցին`նոր կառավարությունում լինելու ցանկությո՞ւն ունի, պատասխանեց. «Ես կարգապահ մարդ եմ»:

Վերջում Մկրտչյանն ավելացրեց, որ  դժվար չէ աշխատել վարչապետ Կարեն Կարապետյանի հետ, և որ իրենք ոչ մի խնդիր չունեն նրա հետ: