Մենք ամաչելու խնդիր չունենք. Չավուշօղլուն կոչ է արել Ցեղասպանության հարցով հանձնաժողով ստեղծել

Թուրքիայի ԱԳ նախարար Մևլութ Չավուշօղլուն Գերմանիայում տված մամուլի ասուլիսի ընթացքում անդրադարձել է Հայոց ցեղասպանության հարցով «պատմաբանների հանձնաժողով» ստեղծելու անհրաժեշտությանը. տեղեկացնում է  Haberler–ը։

Չավուշօղլուն ասել է. «2015 թվականը ոչ թե միայն այդ պնդումների, այլ նաև Չանաքքալեի ճակատամարտի 100-ամյակն է։ Մեր՝ Հայաստանին ուղղված հրավերի պատասխանը դաստիարակության սահմանները հատող էր»։

Նա դարձյալ շեշտել է «պատմաբանների հանձնաժողով ստեղծելու» կարևորությունը։ «Թող ընդհանուր հանձնաժողով ստեղծվի և հայտարարություն արվի: Մենք այդ հարցում ամաչելու խնդիր չունենք»,- ասել է Չավուշօղլուն։

Նա խոսել է նաև Գերմանիայի` վերջերս դրսևորած կեցվածքի մասին և գնահատել է նրա` չմիջամտելու քաղաքականությունը:

Չավուշօղլուն դժգոհել է, որ որոշ գերմանացի քաղաքական գործիչներ աջակցում են հայկական նախաձեռնություններին, ինչը «վշտացնում է իրենց»: «Սահմանափակ տեղեկություններ ունեցող քաղաքական գործիչների կողմից հարցը մեկնաբանելն անգամ սխալ է»,- ասել է նա: