«Եթե այսպես շարունակվի, կարող են օպերան էլ քանդել, որ խաչմերուկը լայնանա»

Մենք քաղաքաշինական ծրագիր ունենք, բայց, ափսոս, դրան հետևող չունենք. լրագրողների հետ զրույցում ասաց ճարտարապետ Գուրգեն Մուշեղյանը:

Ըստ նրա` Երևանում մի շարք խնդիրներ կան, որոնք այդպես էլ չլուծված են մնում, բայց ամենակարևորը տրանսպորտի և տարաբնակեցման հարցերն են: «Տարաբնակեցման հետ կապված կասեմ, որ չկա ծրագիր, թե որտեղ քանի մարդ պետք է ապրի, և այդ պատճառով էլ հանրապետությունը կուտակվում է Երևանում, իսկ Երևանը` կենտրոնում: Իսկ տրանսպորտը դարձել է փոխադրամիջոց միայն «2-րդ սորտի» մարդկանց համար` այնքան անհարմարավետ է, և անգամ նրանք, ովքեր փող չունեն, մի կերպ ավտոմեքենա են գնում, որ հասարակական տրանսպորտ չնստեն: Պետք է ավտոբուսների թիվն ավելացնել, վճարային մեկ համակարգ ստեղծել, ինչը չի արվում, քանի որ գծատերերին ձեռնտու չեն լինի փոփոխությունները»,- ասաց Մուշեղյանը:

Ըստ նրա` բացի այդ, Երևանի փողոցները գլխավոր հատակագծի ֆունկցիաները չեն կատարում: Ճարտարապետը նշեց, որ եթե այսպես շարունակվի, պիտի օպերան էլ քանդեն, Ֆրանսիայի հրապարակն էլ, որ խաչմերուկը լայնանա, քանի որ մայթերը բռնագրավել են խանութները:

Այս ամենում, ըստ բանախոսի, մեծ դեր կարող է ունենալ Երևանի ավագանին, եթե կարողանա օբյեկտիվորեն անդրադառնա խնդիրներին, այլ ոչ թե, ինչպես հաճախ լինում է, միայն կուսակցության շահերից բխելով, ինչ-որ քայլեր անի: