Եթե այսպես շարունակվի, նորից կկրկնվի դեկտեմբերի 7-ը

Կարինե ՀԱՐՈՒԹՅՈՒՆՅԱՆ

«1988-ի երկրաշարժը մեզ շատ դասեր տվեց, բայց այդ դասերը, ցավոք սրտի, ընկալեցին միայն մասնագետները, բայց ոչ` պետական այրերը: Մենք Խորհրդային Հայաստանից ունենք ահավոր ծանր ժառանգություն այն շենքերի տեսքով, որտեղ ապրում և աշխատում ենք»,- կարծում է Սեյսմակայուն շինարարության հայկական ասոցիացիայի նախագահ, տեխնիկական գիտությունների դոկտոր, պրոֆոսոր Միքայել Մելքոնյանը:

Ըստ Միքայել Մելքոնյանի, Երևանը ամենավտանգավոր սեյսմիկ կենտրոնն է այժմ, քանի որ ամենախիտ բնակեցվածն ու կառուցապատվածն է: Սեյսմիկ մասնագետը բոլորին խորհուրդ է տալիս դուրս գալ կենտրոնից, քանի որ եթե նույն ուժգնությամբ երկրաշարժ լինի, ինչպես 1988-ին, ապա միայն Երևանում կունենանք 80 տոկոս ավերածություն: «Ավելին, արտակարգ իրավիճակների նախարարությունը նստած է մի շենքում, որը, կարծես, «Նաֆ-Նաֆի տունը» լինի: Մեր նպատակը սեյսմաանվտանգ շինությունների կառուցումն է. մենք կառուցել ենք այդպիսի ընդամենը 36 շենք»,- ասաց Մ. Մելքոնյանը: