Որոշ վերքեր չեն բուժվում ժամանակի ընթացքում. Կարո Փայլանն ուղերձ է հղել

Թուրքիայում քրդամետ Ժողովուրդների դեմոկրատական կուսակցության հայ պատգամավոր Կարո Փայլանը Հայոց ցեղասպանության 102-րդ տարելիցի կապակցությամբ ուղերձ է հղել իր ֆեյսբուքյան էջում:

Փայլանի տարածած լուսանկարում, որտեղ նռան վրա մակագրված է` «Որոշ վերքեր չեն բուժվում ժամանակի ընթացքում», ասվում է. «Այսօր ապրիլի 24-ն է՝ 1915 թվականի Հայոց ցեղասպանության զոհերի հիշատակի օրը: Մեծ Եղեռնից անցել է 102 տարի, սակայն այս հողերում տեղի ունեցած՝ մարդկային հանցանք համարվող Հայոց ցեղասպանության հետ դեռևս չեն առերեսվել, թեև Ցեղասպանության հետ, անցյալի և իրականության հետ առերեսվելը կնպաստի մեր երկրում հասարակության խաղաղությանը: Չմոռանանք, որ անպատիժ մնացած յուրաքանչյուր հանցանք դրա կրկնության համար պատճառ կհանդիսանա, ինչպես և շարունակում է հանդիսանալ…

Եկեք միասնաբար դեմն առնենք գրի առնված այս հերքողական պատմության, իրականացնենք ճշմարտության բացահայտումն ու լավանանք:

Հարգանքով եմ հիշում Հայոց ցեղասպանության զոհերին: Թող լուսավորվեն նրանց հոգիները»: