Վրաստանը գազ կգնի Ադրբեջանից

Վրաստանը հրաժարվում է մինչև ընթացիկ տարվա վերջը գազ գնել ռուսական «Գազպրոմ» ընկերությունից և անհրաժեշտ ամբողջ ծավալը կգնի Ադրբեջանից: Այդ մասին լրագրողներին հայտնել է էներգետիկայի նախարար Կախա Կալաձեն. հայտնում է РИА Новости-ն:

Նախարարի խոսքով` գնումից հրաժարվելու հնարավորություն է տալիս ընկերության հետ կնքված համաձայնագիրը: «Մեզ հնարավորություն է տրվում գազ ձեռք բերելու Ադրբեջանից կամ Իրանից: Այսօրվա դրությամբ մենք որոշել ենք ամբողջովին օգտվել ադրբեջանական բնական գազից»,- հայտարարել է Կալաձեն:

 Նախարարը հավելել է, որ «Գազպրոմ»-ի հետ 2-ամյա պայմանագրի գործողության ժամկետի լրանալուց հետո Վրաստանը ավելի քիչ կախվածություն կունենա ռուսական գազից, քանի որ կառուցված կլինի գազապահեստարան: