Նրանց առաջին ամուսնությունը չէ. Արմեն Մարտիրոսյանը՝ ՕՐՕ-ի առաջնորդների հիասթափության մասին

ՕՐՕ դաշինքի անդամ Արմեն Մարտիրոսյանն այսօր լրագրողներին հայտնեց, որ Երևանի ավագանու ընտրություններին իրենց մասնակցության վերաբերյալ քննարկումներ են ընթանում:  «Իմ անձնական կարծիքով՝ պետք չէ մասնակցել»,- ասաց նա՝ հավելելով, որ ցանկացած պարագայում իշխանափոխության հարցը մնում է իրենց օրակարգում, իսկ փողոցային պայքարն ունի իր ժամանակահատվածը:  «Դրա համար պետք են որոշակի շարժառիթներ, դրանք շատ-շատ են լինելու, և  ակնհայտորեն, երբ այդ շարժառիթները լինեն, և ժողովուրդը փողոց դուրս գա, մենք նրանց առաջին շարքերում ենք լինելու»,- նշեց Մարտիրոսյանը:

Հարցին՝ խորհրդարանական ընտրությունների արդյունքներն արդյո՞ք չեն հիասթափեցրել ՕՐՕ դաշինքի առաջնորդներին, և նրանք շարունակելո՞ւ են պայքարել, նա պատասխանեց. «Ինչպես ասում են՝ նրանց առաջին ամուսնությունը չէ: Րաֆֆի Հովհաննիսյանն անցել է նաև այն էտապը, որ անգամ նրա երեխաների տետրերն են ստուգել ԱԱԾ-ի աշխատակիցները: Սեյրան Օհանյանն էլ անցել է Ղարաբաղյան պատերազմով և ավելի վատ բաներ է տեսել»:

Մարտիրոսյանը կարծիք հայտնեց նաև, որ առաջիկա խորհրդարանում «Ծառուկյան» դաշինքն է լինելու ընդդիմություն: