Արմեն Մարտիրոսյանը լղոզեց ՕՐՕ դաշինքի գաղափարախոսության մասին հարցը

«Ժառանգություն» կուսակցության փոխնախագահ, ՕՐՕ դաշինքի համամասնական ցուցակի երկրորդ համար Արմեն Մարտիրոսյանը այսօր լրագրողների հետ զրույցում անդրադարձավ Զարուհի Փոստանջյանի՝ «Ժառանգություն» կուսակցությունից դուրս գալուն: Նա նշեց, որ թեև դեռ չեն ստացել Փոստանջյանի դիմումը, սակայն նա արդեն իսկ հայտարարել է, ինչին էլ իրենք հարգանքով են վերաբերվում:

«Խորին հարգանքով եմ վերաբերվում նրա այդ քայլին, նրա դուրս գալը ծափողջյուններով չէ, որ կարելի է ընդունել, սակայն համամիտ չեմ, որ հեռացել ենք մեր գաղափարներից ու սկզբունքներից»,- ասաց Մարտիրոսյանը, ապա հավելեց, որ միայն բարին կարող է մաղթել Զարուհի Փոստանջյանին:

Նա նաև վստահություն հայտնեց, որ քաղաքական կյանքը այնպիսի բան է, որ իրենց և Զարուհի Փոստանջյանի ճանապարհները կրկին կարող են խաչաձևվել, քանի որ պայքարի բազում բևեռներ կարող են լինել:

Դիտարկմանը՝ շատերը հենց «Ժառանգություն» ասելիս Զարուհի Փոստանջյան են հասկանում, հիմա ո՞վ է «Ժառանգությունը», Մարտիրոսյանը պատասխանեց. «Այն կուսակցականներն են, որոնք այս տարիներին, առանց ակնկալիքների, լուռումունջ ապահովել են, որ ունենանք հայտնի դեմքեր: «Ժառանգությունը» նաև Րաֆֆի Հովհաննիսյանն է»:

Ինչ վերաբերում է դաշինքի ցուցակի առաջին հսմարին, Մարտիրոսյանն ասաց, որ եթե տիկին Փոստանջյանը լիներ իրենց հետ, կհավակներ դաշինքի ցուցակը գլխավորելուն, բայց նա ի սկզբանե մերժում էր ամեն ինչ:

«Սեյրան Օհանյանի անձը քննարկելը ճիշտ չէ, որևէ մեկը չի եղել, որ ցանկանա առաջինը լինել: Օհանյանի հետագիծը քաղաքական հետագիծ չէ, անկախ նրանից` ով է եղել իշխանության մեջ, նա բանակի մեջ է եղել: Չեմ սրբացնում նրան, սխալներ ունեցել է, արդեն իսկ` որ իշխանության մեջ է եղել, դա արդեն սխալ է, ուղղակի կա համեմատության խնդիր, նայում ենք դրականը ու բացասականը, տեսնում ենք, որ դրականը մեծ է պարոն Օհանյանի մոտ»,- ասաց նա:

Yerkir.am-ի հարցին՝ ո՞րն է ձեր դաշինքի գաղափարական հենքը, Մարտիրոսյանն արձագանքեց. «Հենքն այն է, ինչ մենք նախկինում արել ենք, երբ տարբեր ժամանակներ համագործակցել ենք տարբեր քաղաքական ուժերի հետ` Դաշնակցության, ՀԱԿ-ի, նաև` քառյակ-եռյակի շրջանակներում: Հենքը երկիրն այս ճահճային վիճակից հանելն է: Հենքը 48 հազար արտագաղթածներն են: «Ժառանգության» համար միշտ էլ կարևորը գաղափարական հենքն է եղել»: