ՀՅԴ ռեյտինգային ցուցակի կին թեկնածուները հանդիպեցին դավիթաշենցիների հետ

Այսօր Երևանի Դավիթաշեն համայնքում քարոզարշավ էին իրականացնում ՀՅԴ ռեյտինգային ցուցակով ընտրված մի քանի թեկնածուներ:

Անահիտ Հարութունյանն իր ելույթում նշեց, որպես մայր, որպես մանկավարժ, կոչ է անում ընտրության գնալիս առաջնորդվել ազնվությամբ, մտածել այն դրույթների մասին, որոնք առաջարկում է ՀՅԴ-ն: «Տվեք ձայնը լավագույններին, նրանց, ովքեր իրենց չեն վարկաբեկել, ովքեր չեն գնում ԱԺ անձնական շահի համար: Հետևեք Դաշնակցության ծրագրին և անցած ուղուն, և ձեր ձայնը մաքուր խղճով տվեք ՀՅԴ-ին, որովհետև այդ քաղաքական ուժն է, որի գերագույն նպատակը ազգային շահն է, ազատ ու արդար Հայաստանը»,- ասաց Անահիտ Հարությունյանը:

Կին թեկնածուներից Ռուզաննա Թադևոսյանն իր ելույթում նշեց, որ նոր խորհրդարանը պետք է համալրվի այնպիսի ուժերով ու գործիչներով, որոնք կարող են իրենց նպաստը բերել պետության կայացման գործում: ՀՅԴ-ն անդավաճան է մնացել իր սկզբունքներին` բարձրագույն արժեք դիտարկելով մարդուն ու նրա իրավունքները: Նա կոչ արեց քաղաքացիներին չվաճառել իրենց ձայնը:

Մեկ այլ կին թեկնածու, մասնագիտությամբ մանկավարժ Սուսաննա Վարդանյանն իր ելույթում ընդգծեց, որ ինքը կուսակցական չէ, այլ ՀՅԴ համակիր: «Էլ ո՞ր կուսակցությանը կարելի է համակրել, լինել նրա կողքին, ցանկանալ տեսնել նրան ԱԺ-ում, եթե ոչ Դաշնակցությանը: Չէ՞ որ սա այն կուսակցությունն է, որն ունի փառահեղ պատմություն, մենք այս կուսակցությանն ենք պարտական շատ նվաճումների համար: Սա այն կուսակցությունն է, որն ազնիվ է ու չի ծախվում»,- ասաց Սուսաննա Վարդանյանը` հավելելով, որ ընտրվելու դեպքում, խորհրդարանում կբարձրացնի կրթության խնդիրները: