ՀՅԴ «Նիկոլ Աղբալյան» ուսանողական միության ներկայացուցիչները հանդիպեցին իջեւանցի ուսանողների հետ

Նոյեմբերի 15-ին Երևանում` ՀՅԴ «Արամ Մանուկյան» երիտասարդական կենտրոնում, ուսանողության հետ հանդիպումով ազդարարվեց ՀՅԴ «Նիկոլ Աղբալյան» ուսանողական միության քարոզարշավը՝ նվիրված սահմանադրական բարեփոխումներին:

Երեկ` նոյեմբերի 16-ին, միության քարոզիչներն այցելեցին Իջևան, հանդիպում ունեցան ինչպես ԵՊՀ Իջևանի մասնաճյուղի ուսանողների, այնպես էլ այլ ԲՈՒՀ-երում սովորող իջևանաբնակ ուսանողների հետ: Հանդիպման ընթացքում ՀՅԴ «Նիկոլ Աղբալյան» ուսանողական միության ներկայացուցիչներ Ռուսլան Բարսեղյանը և Գևորգ Ղուկասյանը հանգամանորեն ներկայացրեցին, սահմանադրական բարեփոխումներով պայմանավորված, ՀՀ ներքաղաքական իրավիճակը, Հայաստանի սահմանադրական զարգացման պատմությունը, 1995, 2005 թ. Սահմանադրությունները, սահմանադրական բարեփոխումների ներկայիս նախագիծը:

Հանդիպմանը ներկա ուսանողներին ներկայացվեցին հիշյալ երկու Սահմանադրություններով և բարեփոխումների նախագծով սահմանված կառավարման համակարգերը, իշխանության ճյուղերի տարանջատման սկզբունքներն ու տրամաբանությունը: Հանդիպումը եզրափակվեց անկաշկանդ հարցուպատասխանով:

Կարևորելով երիտասարդության և հատկապես` ուսանողության հետ համապատասխան հանդիպումները` ՀՅԴ «Նիկոլ Աղբալյան» ուսանողական միության ներկայացուցիչները քարոզչական հանդիպումներ կունենան նաև Հրազդան, Վանաձոր, Արտաշատ, Գյումրի և այլ քաղաքներում: