Սեյրան Օհանյանը խոսեց այլոց հարստության մասին՝ «մոռանալով» մատնանշել իրենը

Այսօր վետերանների միավորման անդամների հետ հանդիպման էին գնացել ՕՐՕ դաշինքի անդամները: Իր ելույթում պաշտպանության նախկին նախարար Սեյրան Օհանյանն ասաց, թե ինչու է դուրս եկել գործադիր իշխանությունից:

«Ինչու ես այդ որոշումը կայացրեցի, որպեսզի առանձին քաղաքական ուժի հետ գնամ ինքնուրույն խնդիրների լուծման ճանապարհով: Պաշտպանության նախարարության ներսում ես զգացի, որ այն ռեսուրսները, որոնք կան, դեռ բավարար չեն, որ բանակի զարգացումն էլ ավելի բարձր մակարդակի վրա դնենք: Պետք է ամուր թիկունք, որի համար էլ ամուր տնտեսություն է պետք»,- ասաց նա:

Ուշագրավ է, որ Սեյրան Օհանյանը ներկայացնում է, թե ինքն է դուրս եկել համակարգից, մինչդեռ դա իրականում այդպես չէ:

Նա թվարկեց այն հաջողությունները, որոնց հասել է` լինելով պաշտպանության նախարար: Օհանյանը նշեց, որ ամենաշատ կոռուպցիոն բացահայտումներն արվել են շնորհիվ իր ջանքերի, նվազել են սուբյեկտիվ գործոնները բանակում, կոռուպցիոն ռիսկերը, հասելէ  արդարության մեծ մակարդակի:

«Զորակոչի մեջ արդարության բավական մեծ նիշ ենք վերցրել: Զորակոչը միշտ պարունակել է կոռուպցիոն մեծ ռիսկ, և շատ մարդիկ այդ ոլորտում մեծ հարստություններ են դիզել: Ես կանգնեցրել եմ այդ ամենը: Ինչո՞ւ մինչև ինձ այդ ամենը չի արվել»,- ասաց նա:

Պաշտպանության նախկին նախարարը նշեց, որ իրենք ունեն կամք, որ կարգ ու կանոն հաստատեն երկրում և վերացնեն ժողովրդի հուսահատությունը, կոռուպցիան, մենաշնորհը և այլ բացասական երևույթներ: