Թիմ է պետք, ոչ թե ինչ-որ անունների շուրջ ձևավորված դաշինքներ. Կիրո Մանոյան

ՀՅԴ ներկայացուցիչներն այսօր նախընտրական քարոզարշավի շրջանակներում հանդիպում ունեցան Կոտայքի մարզի Աբովյան քաղաքի բնակիչների հետ:

ՀՅԴ Բյուրոյի Հայ դատի և քաղաքական հարցերի գրասենյակի տնօրեն Կիրո Մանոյանն իր ելույթում ասաց, որ շատ կարևոր է գիտակցել՝ ապրիլի 2-ին սպասվող ընտրությունները նախագահական չեն: «Նախագահ չենք ընտրելու, թագավոր չենք ընտրելու, ընտրելու եք թիմ»,- ընդգծեց Մանոյանը՝ շեշտելով՝ հենց Դաշնակցությունն է, որ ստեղծման օրից ունի հստակ գաղափարախոսություն և միայն ընտրությունից-ընտրություն չէ, որ գաղափարներ ու ծրագրեր է առաջարկում:

Մանոյանը հիշեցրեց, որ ՀՅԴ-ի՝ ընդդիմություն եղած ընթացքում էլ կուսակցության՝ խորհրդարանում ներկայացված հինգ ներկայացուցիչներն աշխատել են ու տեսանելի արդյունքներ ցույց տվել: «Մարդը կարող է` լավ բարեգործություն է անում, գործարար է, բայց ԱՄՆ-ի օրինակով էլ տեսնում ենք՝ եթե մարդը չի խառնվել քաղաքականության մեջ, ինչ կարող է լինել: Թիմ է պետք, ոչ թե ինչ-որ անունների շուրջ ձևավորված դաշինքներ: Փորձում են իրենց անվան վրա շեշտը դնել, բայց անձ չենք ընտրում, ընտրում ենք թիմ: Կան կուսակցություններ, որոնք անուն են փոխել: Եթե դեմքը մնալու էր նույնը, ինչո՞ւ է անուն փոխվել: Մենք նման խնդիր չունենք»,- ասաց Մանոյանը:

Նա մարդկանց դիմեց՝ ասելով, որ չտարվեն զուտ խոստումներով և չգայթակղվեն կաշառքներով: «Կաշառքը մանանա չէ երկնքից, մի տեղից բերում են, հետո ժողովրդից են վերցնում: Դրա համար պետք է ընտրել ճիշտ թիմի»,- ասաց Մանոյանը: