ՀՅԴ-ի առաջարկը դուր չեկավ «Ծառուկյան» դաշինքին, Մարուքյանը պաշտպանեց` Հայաստանում բարերարների անուններով դաշինքներ չեն կարող գրանցվել

Այսօր խորհրդարանում տեղի ունեցավ Ընտրական օրենսգրքի շուրջ ձևավորված ԱԺ աշխատանքային խմբի առաջին նիստը: ՀՅԴ 10 առաջարկները ներկայացրեց ԱԺ ՀՅԴ խմբակցության ղեկավար Արմեն Ռուստամյանը: Բավականին լուրջ քննարկումներ ծավալվեցին ՀՅԴ առաջարկած 7-րդ կետի վերաբերյալ: Առաջարկվում է ընտրություններից առաջ (ողջամիտ ժամկետներով) դադարեցնել բարեգործական կազմակերպությունների կողմից բարեգործական ակցիաների կատարումը, բացառել այն կուսակցությունների կամ դաշինքների մասնակցությունն ընտրություններին, որոնց անվանումները համընկնում են բարեգործական կազմակերպությունների անվանումների հետ։

ՀՀԿ ներկայացուցիչ Դավիթ Հարությունյանն առարկեց. «Գործող օրենքի ձևավորումն ինչո՞վ չի բավարարում, այն տպավարությունն է, որ անհաջող ձևակերպված է գործող օրենքի նորմ»:

Ռուստամյանը բացատրեց, որ դրված սահմանափակումները նույնը չեն, և որ իրենք առաջարկում են խստացնել դրանք:

Դավիթ Հարությունյանը շարունակում էր պնդել, թե չի հասկանում` ինչի մասին է խոսքը:

Միջամտեց «Ելք» խմբակցության պատգամավոր Էդմոն Մարուքյանը: «Առաջարկը շատ պարզ է: Ընտրական քարոզարշավի ընթացքում դա արգելելը հեշտ է, բայց քարոզարշավից մեկ ամիս առաջ քաղաքական ուժի հետ ասոցացվող հիմնադրամը կարո՞ղ է բարեգործություն անել, թե՞ ոչ, պետք է ժամկետներին նայել»,- ասաց նա:

«Եթե ես ստեղծում եմ «Դավիթ Հարությունյան» հիմնադրամ, այլևս իրավունք չունե՞մ քաղաքական կյանքին մասնակցելու»,-հարցրեց Հարությունյանը:

Ռուստամյանը պարզաբանեց, որ կարող է, բայց պետք է հիմնադրամի գործունեությունը դադարեցնի, որովհետև նախընտրական քարոզչություն է, և այդպիսի հիմնադրամ չպետք է լինի: «Եթե կա «Պողոս Պողոսյան» հիմնադրամ, և Պողոս Պողոսյանը ցանկանում է զբաղվել քաղաքականությամբ, ապա պետք է իր կուսակցության անունն ուրիշ լինի»,- բացատրեց նա:

Դավիթ Հարությունյանը շարունակում էր պնդել, թե ինքը չի հասկանում` ինչի մասին է խոսքը: «Օրենքում ասվում է` այն բարեգործական կազմակերպությունները, որոնց անվանումները նախընտրական քարոզչության ժամանակ կարող են նմանեցվել կամ ասոցացվել ընտրություններին մասնակցող կուսակցությունների անվանումների, թեկնածուների անուններին, բարեգործություն չեն կարող իրականացնել այն համայնքներում, որտեղ անցկացվում են ընտրություններ»,- ասաց Հարությունյանը:

Ռուստամյանն էլ հակադարձեց, որ իրենց ասածն այն է, որ այդ կարգավորումը քիչ է, և որ իրենց ձևակերպումը չի հակասնում օրենքին, ընդամենը պետք է խստացնել:

Էդմոն Մարուքյանը նշեց. «Դուք ասում եք` օրենքով նախատեսվում է, մենք ասում ենք, որ օրենքով մեղմ է, քան Դաշնակցության առաջարկը, պետք է խստացնել: Պարո'ն Հարությունյան, առաջարկը սա է` քննարկել ժամկետներ` օրենքում այդ դրույթը խստացնելու համար: Դա կլինի ընտրական օրենսգրքում, թե` բարեգործության մասին օրենսգրքում: Գաղափարը սա է»:

ՀՀԿ ներկայացուցիչ Արփինե Հովհաննիսյանը մի քանի հարց ուղղեց Ռուստամյանին: «Ստեղծվել է հիմնադրամ, հետո պետք է բացվի կուսակցություն, այս դեպքում կուսակցության գրանցումը պետք է մերժվի՞, թե՞ հիմնադրամի անվանման փոփոխությունը թույլ է տալիս կուսակցությունը գրանցել, և այդ պահին գոյություն ունի և' հիմնադրամը, և' կուսակցությունը: Նշանակո՞ւմ է, արդյոք, որ դադարեցնող դրույթի ուժով դրանք պիտի դադարեցնեն իրենց գործունեությունը»,- հարցրեց նա:

Հաջորդ հարցը հետևյալն էր` կուսակցությունը գործում է, հետո հիմնադրամն է ստեղծվում, հիմնադրամի գրանցումը պետք է մերժվի՞:

Ռուստամյանը պատասխանեց. «Մեր ասածը հետևյալն է` եթե երկուսն էլ արդեն կան, ապա այդ նույն անունով կուսակցությունը չպետք է մասնակցի ընտրություններին. եթե կա «Պողոս Պողոսյան» հիմնադրամ, ապա նույն անունով կուսակցություն չպետք է ընտրություններին մասնակցելու հայտ ներկայացնի»:

Պաշտպանության նախկին նախարար Վիգեն Սարգսյանն արձագանքեց. ««Լուսավոր Հայաստանը» «Լույս» հիմնադրամի հետ ասոցացվո՞ւմ է, թե՞ ոչ»:

Ռուստամյանը պատասխանեց, որ անվանումը նմանեցնելու ձևերը կարելի է տարբեր ձևերով վերլուծել, և որ դա արդեն իր խնդիրը չէ:

«Եթե ես, լինելով «Լուսավոր Հայաստան» կուսակցության նախագահը, նաև «Լույս» հիմնադրամի նախագահը լինեի և «Լույս» հիմնադրամով հազարավոր երիտասարդների ուղարկեի Հարվորդ` սովորելու, կարող էր լինել ասոցացում»,- արձագանքեց «Լուսավոր Հայաստան» կուսակցության նախագահ Էդմոն Մարուքյանը:

Արփինե Հովհաննիսյանը հարցրեց` հիմնադրա՞մը պետք է փոխի անունը, թե՞ կուսակցությունը:

Ռուստամյանն ասաց, որ այդ մարդը պետք է որոշի:

«Բարեգործության մասին» օրենքի փոփոխությունների մասին քննարկումները բուռն էին ընդունվում «Ծառուկյան» դաշինքի պատգամավորների կողմից: Այս հարցին ևս նրանք անմաս չմնացին: Մասնավորապես` «Ծառուկյան» դաշինքի պատգամավոր Սերգեյ Բագրատյանին դուր չեկավ ՀՅԴ-ի այս առաջարկությունը:

«Ձեր նշած ձևակերպումը լրիվ այլ եզրույթի դաշտում պետք է քննարկել: Դա նույնն է, եթե ես ասեմ` Դաշնակցության որևէ կառույց որևէ երկրում ահաբեկչություն է արել, Դաշնակցությունն ընտրություններին չպիտի մասնակցի: Օրենքով ամրագրված դրույթ կա, որը ռեալ արտահայտում է այս իրավիճակը»,- ասաց նա:

Միջամտեց ԱԺ ՀՅԴ-ական պատգամավոր Սպարտակ Սեյրանյանը: «Оսմանյան կայսրությունում բոլոր ահաբեկչությունները վերցնում եմ ինձ վրա, ընտրությունների չե՞մ կարող մասնակցել»,- հարցրեց նա:

Բագրատյանն էլ հակադարձեց, որ իր ասածն ուրիշ է: «Չէ, ասածս ուրիշ է: Բավարարվենք օրենքով, պարո'ն Ռուստամյան, 7-րդ կետը հանենք, թե չէ` կմտնենք թյուրիմացությունների գիրկը»,- ասաց նա:

Ռուստամյանը նշեց, որ իրենք պարզապես խստացման են տանում: Բագրատյանն էլ առարկեց, թե ֆետիշացման են տանում:

«Ոչ մի բան էլ չենք ֆետիշացնում, շատ հստակ հարց ենք դնում` եթե կա հիմնադրամ որևէ անուն-ազգանունով, այդ անունով որևէ մեկը չի կարող գրանցվել ու մասնակցել ընտրություններին»,- կրկին բացատրեց Ռուստամյանը:

Բագրատյանը էլի հակադարձեց. «Պարոն Սարգսյանը լավ օրինակ բերեց` «Լույս» հիմնադրամն ու «Լուսավոր Հայաստանը» նո՞ւյնն են»:

Ռուստամյանը պատասխանեց` եթե երկու անուններն էլ լույս լինեն, նորմալ չէ: «Ժողովրդին 30-40 օրում անհնար է բացատրել, որ դա նույն հիմնադրամը չէ, նախ` որ ասում եք` ահաբեկչություն, ահաբեկչություն, դրա մասին չէ խոսքը, օրինակ` կա Հայ օգնության միություն, մի օր ՀՅԴ-ն որոշի ընտրություններին մասնակցել ՀՕՄ անունով, ի՞նչ, նորմա՞լ է»,- ասաց նա:

Բագրատյանը համաձայնեց, որ նորմալ չէ:

«Դե ես էլ ասում եմ, որ նորմալ չէ: Ինչի՞, որ Դաշնակցությո՞ւնն է, նորմալ չի»,- ասաց Ռուստամյանը:

Բագրատյանն էլ նշեց, որ պարզապես ՀՕՄ-ը հազար տարի է կա: Ռուստամյանն էլ շեշտեց, որ ՀՅԴ-ն էլ կա հազար տարի:

Բագրատյանին մնաց միայն ասելու, թե դա օրենքով ամրագրված է:

Վիգեն Սարգսյանն էլ ասաց. «Հարցադրումներ հնչեցին, որոնք խորհելու տեղ պետք է տան թե' պարոն Ռուստամյանին, թե' մեզ` բոլորիս, մասնավորապես` պարոն Մարուքյանին, որովհետև հիմա ստուգում էի, պարզվեց` գոյություն ունի` «Լուսավոր Արարատ», «Լուսավոր քաղաք», «Լուսավոր Ջերմուկ», ու համենայն դեպս, մնում է ուշադիր լինեք և իմանաք, որ նման հիմնադրամներ կան»:

Էդմոն Մարուքյանն էլ ասաց, որ կա Հանրապետական հիվանդանոց, որտեղ հազարավոր մարդիկ են բուժվում: «Եկեք մեզ սարեր- ձորեր չգցենք: Խոսքը հետևյալի մասին է` կան Հայաստանում հեղինակություն ունեցող անձինք, ովքեր մեծ բարերարներ են, հիմա այս մարդկանց անուններով չեն կարող դաշինքներ գրանցվել, սա է ՀՅԴ ասածը, այդքան բան»,- ասաց պատգամավորը:

Արմեն Ռուստամյանն էլ ասաց, որ ինքը գաղափարը ներկայացրեց, իսկ կոնկրետ ձևակերպումները պետք է գտնել: «Բայց որ դա կարող է ընտրողների մոտ թյուրիմացություն առաջացնել, դա փաստ է: Մեզ վրա բերեցի օրինակը, բոլորդ համաձայնեցիք»,- եզրափակեց նա: