Կրթության ոլորտի ծախսերը նվազեցվել են՝ աշակերտների թվի նվազմամբ պայմանավորված. ֆինանսների նախարար

Այսօր ԱԺ հերթական քառօրյա նիստում քննարկվում էր 2017թ. պետական բյուջեի նախագիծը երկրորդ ընթերցմամբ ընդունելու հարցը: Հիմնական զեկուցող` ֆինանսների նախարար Վարդան Արամյանը նշեց, որ բյուջեի կազմման հիմնական սկզբունքները չորսն են: Առաջինը` բյուջեն պետք է լինի մակրոտնտեսական զարգացմանը համահունչ և իրատեսական: Մյուս սկզբունքը մակրոտնտեսական կայունությունն է: Երրորդը հարկերի հավաքագրման սկզբունքն է, այն պետք է լինի իրատեսական, որ լրացուցիչ ծանրաբեռնվածություն չդրվի տնտեսվարողների վրա, քանի որ կառավարության հիմնական գլխավոր թիրախը տնտեսական աճն է, որի բաղադրիչը տնտեսվարող սուբյեկտներն են: Չորրորդ սկզբունքը կառավարության ստանձնած սոցիալական պարտավորություններն են, միջազգային կազմակերպությունների առջև ստանձնած պարտավորությունները և այլն:

Նախարարը հույս հայտնեց, որ 2018թ. կառավարությունը կանցնի ծրագրային բյուջետավորման: Վերանայվել են որոշ ծախսեր: Կրթության ոլորտում 1,25 միլիարդ դրամով նվազեցրել են ծախսերը, ինչը կապված է աշակերտների թվի ճշգրտման հետ: Ծախսերը նվազեցվել են ԱԱՀ վերադարձման հետ կապված գործընթացում, կապիտալ այլ ծախսերի մասով: Նվազեցվել են ծախսերը նաև պետական կառավարման ապարատի պահպանման մասով՝ 0,3 միլիարդ դրամի չափով, որը կապված է պետական ապարատի, ԾԻԳ-երի, ՊՈԱԿ-ների օպտիմալացման հետ: Նախարարի խոսքով՝ արդեն ավարտվել է 4 ԾԻԳ-ի փակման գործընթացը, շարունակվում է մնացած ԾԻԳ-երի ու ՊՈԱԿ-ների փակման իրավական գործընթացը: Ծախսեր կան, որոնք նվազեցվել են` գազի սակագների փոփոխմամբ պայմանավորված:

«Բյուջեն պետք է լինի իրատեսական ու բալանսավորված: Ռեսուրսները սահմանափակ են, պետք է վերցնենք այնպիսի պարտավորություններ, որոնք հավելյալ պարտքեր չեն առաջացնի»,- ասաց նախարարը՝ բացատրելով, թե ինչու են պատգամավորների ներկայացրած տասնյակ առաջարկները մերժել: