Աշակերտների թվի նվազման պատճառով մի շարք ուսումնական հաստատություններ կվերակազմակերպվեն

Վաղը կառավարության նիստում ԿԳ նախարար Լևոն Մկրտչյանը կներկայացնի Վայքի ու Եղեգնաձորի պետական վարժարանները վերակազմակերպելու հարցը:

Վարժարանների վերակազմակերպումը ուսումնական հաստատություններում աշակերտների թվի նվազմամբ ու ուսումնական տարածքների օպտիմալ օգտագործմամբ է պայմանավորված:

Խնդիրն այն է, որ Վայքի ավագ դպրոցում սովորում է 143 աշակերտ, սակայն դպրոցն ունի 5 մասնաշենք և նախատեսված է 400 աշակերտի համար։ Վայքում գործում է նաև տեղի վարժարանը, որտեղ սովորում է 50 աշակերտ: Եղեգնաձորի պետական վարժարանում էլ սովորում է 58 աշակերտ, իսկ տեղի ավագ դպրոցում /որը նախատեսված է 464 աշակերտի համար` 204 աշակերտ: ԿԳ նախարարն առաջարկում է ավագ դպրոցները միացնել վարժարաններին, ինչի արդյունքում աշակերտների բնականոն ուսումնական գործընթացը կկազմակերպվի առավել արդյունավետ, ինչն էլ իր հերթին կնպաստի կրթության որակի բարձրացմանը:  Միացման արդյունքում, նոր հաստիքացուցակների հաստատմամբ հնարավոր են հաստիքների  կրճատումներ, մասնավորապես վարչական և ուսումնաօժանդակ, պայմանավորված նոր ուսումնական տարվա սկզբին արտադրական ծավալների փոփոխմամբ  /աշակերտների թվի փոփոխություն/:

Բացի այդ` կվերակազմակերպվեն նաև Գյումրու թիվ 23 հիմնական և թիվ 42 ավագ դպրոցները, ինչպես նաև Տավուշի մարզի Բերդի վարժարանը կմիանա Բերդի ավագ դպրոցին: