Ստանիսլավսկին գուցե հավատար այդ վիրտուոզ ելույթներին. Շուշան Պետրոսյան

Այսօր ԱԺ հերթական քառօրյա նիստում շարունակվում է բանակում փոխհատուցման համակարգն ապահովող հիմնադրամի ստեղծման հարցը: Պատգամավորները հանդես են գալիս ելույթներով:

Ելույթ ունեցավ նաև ՀՀԿ խմբակցության պատգամավոր Շուշան Պետրոսյանը: Նա հայտարարեց, որ 1000 դրամների շուրջ աղմուկը իր համար զարմանալի է ու ցավոտ: Պատգամավորի համոզմամբ` աղմուկ հանողը աղմուկ է հանում, ծառայողն էլ լուռ ծառայում է:

«Ես չգիտեմ ավելի կարևոր բան, քան բանակի, զինվորի կողքին լինելն է»,- ասաց Շուշան Պետորսյանը:

Նրա խոսքով` այս նախագիծը երկարաժամկետ լուծումներ է ապահովում զինվորի համար, իսկ անվստահության խնդիրը կարելի է լուծել հասարակական վերահսկողությամբ ու թափանցիկությամբ: «Մենք պարտք ունենք զոհվածների ընտանիքների ու հաշմանդամ դարձած զինվորների առաջ: Ո՞ւմ է ձեռնտու, որ այս օրենքը տապալվի, պաշտպանության նախարարությա՞նը, օրենսդիրների՞ն»,- հարցրեց պատգամավորը:

Նա կեղծ համարեց որոշ պատգամավորների կրակոտ ելույթները: «Ստանիսլավսկին գուցե հավատար այդ վիրտուոզ ելույթներին, բայց ես չեմ հավատում»,- ասաց Շուշան Պետրոսյանը: