Թերթ ընթերցող Շմայսը չի դիմանում բորբոքված ելույթներին

Երեկ, երբ ԱԺ-ում քննարկվում էր կառավարության ծրագիրը, դեռևս մինչ Նիկոլ Փաշինյանի էմոցիոնալ ելույթը, ԱԺ ՀՀԿ խմբակցության պատգամավոր Առաքել Մովսիսյանը բոլորի համար անսպասելի թերթ էր կարդում կամ թերթում, մասնավորապես` «Հայկական ժամանակ»:

Լրագրողները մի պահ մտածեցին, որ Առաքել Մովիսիսյանը փոխել է իր իմիջը, սակայն քիչ անց` Նիկոլ Փաշինյանի ելույթի ժամանակ, նա, այնուամենայնիվ, չկարողացավ զսպել իրեն ու սկսեց տեղից բղավել` փորձելով պաշտպանել այն մարդկանց, ում դեմ խոսում էր Նիկոլ Փաշինյանը:

Երեկ, երբ Շմայսից փորձեցինք հետաքրքրվել` այդ ի՞նչ էր պատահել, որ լեզվակռիվ սկսվեց իր և Նիկոլ Փաշինյանի միջև, նա պատասխանեց. «Լավ անցանք, չեմ ուզում դրա մասին խոսեմ»:

Այսօր, երբ ՕԵԿ խմբակցության պատգամավոր Հեղինե Բիշարյանն էր էմոցիոնալ և ընդդիմադիր ելույթ ունենում,  Շմայսը կրկին չդիմացավ, տեղից ըմբոստացավ, թե` երբ ՕԵԿ-ը կոալիցիայում էր, լա՞վ էր: Այսօր կրկին հետաքրքրվեցինք` ի՞նչ է պատահել նրա հետ այս երկու օրը` լեզվակռվի մեջ է մտնում պատգամավորների հետ` աղմուկ առաջացնելով դահլիճում, կրկին խուսափեց պատասխանից. «Էսօր տրամադրություն չունեմ, մի խոսացրեք»: