Իշխանությունը չի ձևավորվում սկզբունքով, թե ով ավելի շատ մարդ կհանի փողոց. Վիգեն Սարգսյան

Պաշտպանության նախարար Վիգեն Սարգսյանն անդրադարձավ Նիկոլ Փաշինյանի հայտարարած ծրագրին, որ վարչապետի հրաժարականից հետո խորհրդարանը պետք է ընտրի ժողովրդական վարչապետին: Սարգսյանը նախ նշեց, որ չգիտի` ով է այդ վարչապետը, ապա բացատրեց, որ դրանով Փաշինյանը Սահմանադրությամբ նախատեսված` պատգամավորի մանդատի ազատությունը սահմանափակում է:

«Արդեն այդ պայմանով սահմանափակվում էր պատգամավորի ազատությունը: Այսինքն` պատգամավորը պետք է գնար ու քվեարկեր նրա օգտին, ում պարոն Փաշինյանը կհամարեր ժողովրդական վարչապետի թեկնածու: Այդպես չի լինում, եթե իշխանությունը ձևավորվեր այնպես, թե ով ավելի շատ մարդ կհանի փողոց, երևի քաղաքակիրթ երկրները վաղուց ընտրությունների կարգը փոխած կլինեին հանրային հավաքների պրակտիկայով, և ում հանրահավաքի ժամանակ ավելի շատ մարդ կհավաքվեր, նա էլ ժողովրդական վարչապետ  կներկայացվեր»,- ասաց նա, ապա հավելեց, որ գուցե դա էլ ապագա ժողովրդավարության մեթոդներից մեկն է, բայց դա այդքան էլ միանշանակ չէ գոնե իր համար: