Մեզ հաջողվեց Երևանը միջազգային ԶԼՄ-ների ուշադրության կենտրոնում պահել. Վիգեն Սարգսյան

ՀՀ նախագահի աշխատակազմի ղեկավար, Հայոց ցեղասպանության 100-րդ տարելիցին նվիրված միջոցառումների համակարգող Վիգեն Սարգսյանն այսօր ամփոփեց Ցեղասպանության 100-րդ տարելիցին նվիրված` մինչ այս եղած միջոցառումները:

Նա նշեց, որ Ցեղասպանության 100-րդ տարելիցին նվիրված ոգեկոչումը չի ավարտվում ապրիլի 24-ով. միջոցառումները շարունակվելու են մինչև տարեվերջ, ավելին` մինչև մյուս` 2016-ի ապրիլի 24-ը:

«Մեր առջև դրված խնդիրները լիարժեքորեն կատարել ենք, և միջոցառումները, որ տեղի ունեցան, ծառայել են այն հիմնական նպատակներին, որ դրել էինք մեր առջև` միջազգային մակարդակում Ցեղասպանության իրազեկման մակարդակի բարձրացումը, ինչպես նաև ցեղասպանությունների դատապարտումը` առհասարակ: Ամենակարևորն այն էր, որ այդ օրերին ազգային-հոգևոր միասնականություն կար, որի համար էլ ուզում եմ շնորհակալությւոն հայտնել բոլորին»,- ասաց Սարգսյանը` հավելելով, որ մեզ հաջողվել է Երևանը միջազգային լրատվության ուշադրության կենտրոնում պահել:

Նա առանձնացրեց Սրբադասման արարողությունը, System of a Down-ի, 24/04 նվագախմբի համերգները, ինչպես նաև ապրիլի 22-24-ը տեղի ունեցած համաժողովը: