Գուցե արդար չէ, բայց իրավական է ու օրինական. Վիգեն Սարգսյանը՝ 1000 դրամի մասին

ԱԺ հերթական քառօրյա նիստում քննարկվում է բանակում հատուցման համակարգն ապահովող հիմնադրամի ստեղծման հարցը՝ «ՀՀ պաշտպանության ժամանակ զինծառայողների առողջությանը կամ կյանքի վնասի փոխհատուցման մասին» օրինագիծը, որի մասին զեկուցեց պաշտպանության նախարար Վիգեն Սարգսյանը:

Հիշեցնենք, որ խոսքը մարտական գործողությունների ժամանակ զոհված զինծառայողների ընտանիքների և հաշմանդամ դարձած զինծառայողների հատուցման և ապահովագրության համար ստեղծվող հիմնադրամի մասին է, որի գումարները գոյանալու են` յուրաքանչյուր աշխատողից ամսական 1000 դրամ գանձելով:

Զեկուցող` պաշտպանության նախարար Վիգեն Սարգսյանը անդրադարձավ հասարակության բարձրացրած այն հարցին, որ դա արդար չէ: Նախարարը համաձայնեց, որ վճար գանձելը արդարացի չէ, բայց այսօր դա այն է, ինչը հնարավոր է անել:

«Իրավական առումով` արդար է, որովհետև սա ապահովագրական վճար է: Օրինակա՞ն է, արդյոք, աշխատավարձից պահում անելը, այո, դա նույնպես օրինական է»,- ասաց նախարարը:

Նա անդրադարձավ հիմնադրամի թափանցիկությանը` ասելով, որ փորձել են տալ համապատասխան լուծումներ. այն, որ հիմնադրամը թիրախային է, հոգաբարձուների խորհրդի կատուցվածքը նույնպես երաշխիք է թափանցիկության, գործելու է կայքէջ, որտեղ իրական ժամանակում կերևա ամեն տեղեկություն` հիմնադրամի գումարի շարժի հետ կապված: