Արմեն Մուրադյանի «ստացած ժառանգությունը» նախանձելի վիճակում չէ

Բավականին տրամադրված եմ, որ շուտով բուհում առկա բոլոր խնդիրները կլուծվեն: Լրագրողների հետ զրույցում ասաց Մ. Հերացու անվան բժշկական համալսարանի ռեկտորի պաշտոնակատար Արմեն Մուրադյանն` անդրադառնալով բուհում առկա կոռուպցիոն գործի, ձերբակալության և վարկային պատմության մասին:

Տեղեկացրել էինք, որ այսօր Մ. Հերացու անվան բժշկական համալսարանի ռեկտոր Միքայել Նարիմանյանն ազատվեց ռեկտորի պաշտոնից` իր իսկ դիմումի համաձայն: Բուհի ռեկտորի ժամանակավոր պաշտոնակատար ընտրվեց ՀՀ առողջապահության նախկին նախարար Արմեն Մուրադյանը:

Ըստ Մուրադյանի` բժշկական համալսարանն ունի իր բարի ավանդույթները, մեծ ավանդն առողջապահական ճակատը պահելու հարցում, իհարկե, կան նաև մարտահրավերներ, որոնց դիմակայել է պետք:

«Կան որոշակի խնդիրներ, որոնք վերլուծելուց հետո ծրագրի ձևով կներկայացնեմ: Սակայն մեր գործունեության հիմնական դրույթը լինելու է այն, որ մենք կարողանանք միջազգային ստանդարտներին համապատասխան որակ ապահովել: Բժշկական համալսարանը շատ հայտնի է տարածաշրջանում, մեր երկրի սահմաններից հեռու, ինչը պատիվ է մեզ համար, և, առհասարակ, վերջին 100 տարվա ընթացքում մեր ժողովրդի առողջական ամբողջ լուծը տարել ենք մենք` այս համալսարանի շրջանավարտներս»,- ասաց նա:

Yerkir.am-ի հարցին, թե նրան չի՞ մտահոգում փաստը, որ դառնում է մի բուհի ռեկտորի պաշտոնակատար, որը վարկային մի շարք պարտավորություններ ունի /ըստ Նարիմանյանի` 1,6 մլն դոլար/, Մուրադյանը պատասխանեց, որ կարծում է`բուհի տնտեսական իրավիճակը վերլուծելուց հետո կկարողանա այս հարցին անդրադառնալ: «Բուհն ունի մեծ ռեսուրս, և դա օգտագործել միայն փաստացի կրթության ոլորտում, ճիշտ չէ: Ռեսուրսները կբավարարեն, որ մենք բոլոր հարցերի լուծումները տանք: Հուսով եմ և բավականին տրամադրված, որ շուտով այս խնդիրները կլուծվեն»,- ասաց նա:

Մեր դիտարկմանը, թե, բացի դրանից, բուհն ամռանը կոռուցպիոն սկանդալի մեջ էր հայտնվել, անգամ` ձերբակալված կա, ինքը տեղյա՞կ է մանրամասներին, Մուրադյանը պատասխանեց, որ այն, ինչ հանրային դաշտում է եղել, տեղյակ է, ավելի մանրամասն` ոչ: «Կարծում եմ` պետք է անենք ամեն ինչ, որ ուսանողության հետ փոխադարձ վստահություն ունենանք, հիմնական ձեռքբերումները պետք է խորացնենք, իսկ եթե կան թերություններ, կշտկենք դրանք»,- ասաց նա:

Հարցին, թե ինչպե՞ս կգնահատի Միքայել Նարիմանյանի աշխատանքը, Մուրադյանը պատասխանեց, որ երբևէ իրեն թույլ չի տա նման գնահատականներ տալ, այն էլ` հանրային կերպով: «Ես դա ոչ կոռեկտ եմ համարում: Ի դեպ, Նարիմանյանի հետ աշխատել եմ ոչ միայն որպես ամբիոնի վարիչ, մենք նույն հիվանդանոցում ենք աշխատել երկար տարիներ: Կարծում եմ` նա իր հրաժարականի պատճառները պարզ ներկայացրեց»,- ասաց ռեկտորի պաշտոնակատարը:

Արմեն Մուրադյանը, երբ ազատվեց առողջապահության նախարարի պաշտոնից, հայտարարեց, որ շտապում է վիրահատարան` աշխատանքի: Դիտարկմանը, թե չի՞ խանգարի նրան ռեկտորի պաշտոնը, պատասխանեց, որ հիմա էլ է գալիս վիրահատարանից, երեկ էլ է այնտեղ եղել: «Բժիշկը չի դադարում լինել բժիշկ, քանի որ դա մասնագիտություն չէ, կոչում է»,- ասաց նա: