Մահից հետո են ասում` ճիշտը կեսարյան հատումն էր. մահացած ծննդկանի հարազատները դատարան են դիմելու

Տեղեկացրել էինք, որ օրեր առաջ Վանաձորի ծննդատանը ծննդկան է մահացել: Վանաձորի 32-ամյա բնակչուհի Հռիփսիմե Նազլուխանյանի մահվան մեջ կնոջ հարազատները բժիշկներին են մեղադրում:

Ըստ նրանց` կնոջ մահվան մեջ մեղավոր են ծննդատան աշխատակիցները՝ ծնունդն ընդունող բժիշկ Արսեն Բալայանն ու բաժանմունքի վարիչի պաշտոնակատար Դավիթ Շահվերդյանը: Բժիշկներին մահացած ծննդկանի հարազատները մեղադրում են անփութության մեջ:

«21 օր մեր աղջիկը հիվանդանոցում պառկած է եղել, ասում են`  ճիշտը բնական ճանապարհով ծննդաբերությունը չէր, այլ կեսարյան հատումը: Միգուցե բժիշկները պետք է այդ մասին նախօրոք մեզ տեղյակ պահեին, ոչ թե մահվանից հետո: Մենք մեր երեխուն էլ հետ չենք բերի, բայց պիտի դատարան դիմենք, որ մեղավորները պատժվեն»,- ասացին ծննդկանի հարազատներից:

Yerkir.am-ին Վանաձորի հիվանդանոցից տեղեկացրին, որ իրենք արել են ամեն հնարավորը, և նախաքննությունը ցույց կտա` ով է մեղավոր:

Նշենք, որ կինը երեխա չուներ` առաջին ծննդաբերությունն էր: Ծննդկանի մահվան դեպքի առթիվ քրեական գործ է հարուցվել: