ՊՈԱԿ-ները և ԾԻԳ-երը ոչ արդյունավետ ձեռնարկություններ են. փոխվարչապետ

Այսօր Ազգային ժողովում լրագրողների հետ զրույցում ՀՀ փոխվարչապետ Վաչե Գաբրիելյանն անդրադարձավ ՊՈԱԿ-ների և ԾԻԳ-երի կրճատման և կենտրոնացման հետ կապված խնդիրներին: Ըստ նրա՝ ՊՈԱԿ-ները և ԾԻԳ-երը ոչ արդյունավետ ձեռնարկություններ են: «Եթե մենք ունենք ոչ արդյունավետ ձեռնարկություններ, ապա անհրաժեշտություն կա ինչ-որ բան անելու»,- ասաց Գաբրիելյանը:

Դիտարկմանը, թե դա կարող է բերել աշխատատեղերի կրճատման, և արտագաղթի նոր ալիք կարող է բարձրանալ, փոխվարչապետն արձագանքեց. «Պետությունը չպետք է միշտ մատուցի վատ ծառայություններ, որպեսզի ապահովի զբաղվածություն: Դա լավագույն ճանապարհը չէ, պետք է հնարավորինս այնպես անել, որ կառավարությունը, պետական ապարատը քաղաքացիներին մատուցեն որակյալ ծառայություններ»:

Ըստ նրա`  ՊՈԱԿ-ների և ԾԻԳ-երի կրճատումից և կենտրոնացումից հետո քաղաքացիները կստանան նույն ծառայություններն ավելի որակով և ավելի մատչելի գներով: «Եթե հնարավոր է մի ծառայություն մատուցել ավելի քիչ փողերով և ստանալ նույն արդյունքը, ապա պետք է գնալ դրան»,- ասաց Գաբրիելյանը: