Սաֆարյանին զարմացրել է Դավիթ Հարությունյանի վերանշանակման փաստը

Այսօր ՀՀ կառավարության կազմում տեղի են ունեցել որոշակի փոփոխություններ, ինչի շուրջ էլ  Yerkir.am-ը զրուցեց քաղաքագետ Ստյոպա Սաֆարյանի հետ:

Քաղաքագետը նշեց, որ ինքը միայն Վարդան Արամյանին է ճանաչում: «Բացի Վարդան Արամյանից, մնացածին չեմ ճանաչում: Կարծում եմ `Վարդան Արամյանը պրոֆեսիոնալ ֆինանսիստ է, բայց չեմ կարող ասել, թե ինչով է պայմանավորված հենց նրա ընտրությունը Կարեն Կարապետյանի կողմից:  Մյուսների մասին կարծիք հայտնել չեմ կարող»,- ասաց Սաֆարյանը` հավելելով, որ շատ կարևոր է, թե նրանք ինչ ծրագիր են ներկայացնելու.  տվյալ պարագայում` անձերի չենք ճանաչում, իսկ կառավարության մասին կարող ենք ինչ-որ նախնական գնահատականներ տալ, երբ ծրագիր ներկայացված կլինի:

Սաֆարյանը զարմանք հայտնեց Դավիթ Հարությունյանի վերանշանակման վերաբերյալ: «Օրինակ` Գագիկ Բեգլարյանը, Գագիկ Խաչատրյանը, հաստատապես կարող ենք ասել, սոցիալական արդարությանը, կամ սոցիալական խմբերին չեն ներկայացրել, նրանք ներկայացրել են օլիգարխիային, և բնական է, որ հեռացվել են: Բայց շատ զարմացած եմ, որ Դավիթ Հարությունյանին է պահել Կարեն Կարապետյանը, մի փոքր տխրեցնում է այս հանգամանքը, չեմ կարծում որ նա իրեն պիտանի է»,- նշեց Նա:

Սաֆարյանը գոհ չէ կառավարության աշխատանքից, և ըստ նրա, պաշտոնանկություններն արդարացված են: «Նրանք արդեն աշխատել են, նրանք արդեն ցույց են տվել, թե ինչ կարող են անել: Ես գոհ չեմ: Վստահ եմ` Կարեն Կարապետյանն էլ գոհ չէ այսպիսի աշխատանքից: Էլի կան մարդիկ, որոնց աշխատանքից ես գոհ չեմ, բայց շատ հետաքրքիր է, թե ինչ է անելու ինքը` Կարեն Կարապետյանը: Շատ խնդիրներ կան, որ այս կառավարությունը չի արել, հետևաբար, այս կառավարությունը չի կարող ինձ որևէ հույս ներշնչել, բայց այս խնդիրների շրջանակներում, եթե Կարեն Կարապետյանը ուզում է կառավարման որակը փոխել, ուրեմն  այդպիսի մարդիկ պետք չեն»,- ասաց նա:

Վերջում Սաֆարյանն ավելացրեց, որ կառավարությունը պետք է ոտքից գլուխ փոխվի, որպեսզի երկրում էլ ինչ-որ բան փոխվի: Նա չցանկացավ կանխատեսումներ անել, թե էլ ո՞ր նախարարը կզրկվի իր պաշտոնից: