Հովիկ Աբրահամյանը լուրջ դերակատարում կունենա երկրում. ՀՀԿ-ական պատգամավոր

Թե\' Տիգրան Սարգսյանին, թե\' Հովիկ Աբրահամյանին բաժին է հասել կառավարման բարդ ժամանակահատված, և բոլորովին էլ անսպասելի չէր Հովիկ Աբրահամյանի այս քայլը. անդրադառնալով վարչապետի հրաժարականին` լրագրողներին ասաց ԱԺ ՀՀԿ խմբակցության պատգամավոր Արտակ Դավթյանը:

Հիշեցնելով Սերժ Սարգսյանի՝ երեկ ելույթը` նա ընդգծեց, որ սահմանադրական փոփոխությունների  շարունակությունն է վարչապետի այս փոփոխությունը:

«Երեկ առավոտյան արդեն նախկին վարչապետը ելույթ ունեցավ, ասաց, որ անհրաժեշտ է համարում, որ հայտնի խնդիրներին նոր լուծումներ տրվեն: Ամենևին չեմ կարծում, որ սա պետք է ընդունել որպես  չսպասված փոփոխություն, և այն` ինչը պետք է առաջիկայում տեղի ունենա»,- ասաց Դավթյանը՝ կրկին հիշելով Սերժ Սարգսյանի ելույթը, որում նա ասել էր, որ զրուցել է Կարեն Կարապետյանի հետ, ով հավաստիացրել էր, որ հստակ պատկերացնում է՝ ինչ փոփոխոթյուններ պետք է լինեն:

Նա նշեց, որ մեր երկրում անհրաժեշտ են տնտեսական, ինչպես նաև քաղաքական փոփոխություններ, և Սերժ Սարգսյանն այդ փոփոխությունների սիմվոլ է համարում հենց Կարեն Կարապետյանին: ՀՀԿ-ական պատգամավորը գերհամարձակ քայլ է համարում, որ Կարեն Կարապետյանն է հենց ղեկավարելու կառավարությունը:

«Տիգրան Սարգսյանն էլ, Հովիկ Աբրահամյանն էլ բավականին բարդ ժամանակներում են եղել վարչապետ, և արդյունքները բոլորիս համար տեսանելի են: Ասեմ, որ ամենամեծ ներդրումը ամերիկյան կազմակերպության կողմից հենց Հովիկ Աբրահամյանի վարչապետության օրոք տեղի ունեցավ, բայց հազիվ թե այն, ինչին ականատես եղանք, բոլորիս սպասումները արդարացնում է»,- ասաց նա:

Ի դեպ, Դավթյանը նշեց նաև, որ պետք չէ բացառել, որ Կարեն Կարապետյանը կլինի վարչապետի պաշտոնում ոչ թե վեց կամ յոթ ամիս, այլ ավելի երկար:

Անդրադառնալով Հովիկ Աբրահամյանի հետագա գործունեության ոլորտին՝ պատգամավորը նշեց, որ հստակ չի կարող ասել՝ մեր քաղաքական իրականությունում կոնկրետ ինչ դերակատարում է ունենալու Աբրահամյանը, բայց որ այդ դերակատարումը լինելու է, հաստատ է: «ԳՄ նիստում Հովիկ Աբրահամյանի՝ նախընտրական շտաբ ղեկավարելու մասին խոսք չի եղել, բայց նախագահը նշեց նաև, որ միասին աշխատելու են: Ինչպիսի՞ն կլինի Աբրահամյանի դերակատարումը, չեմ կարող ասել, բայց նա կունենա բավական լուրջ դերակատարում ոչ միայն ՀՀԿ-ում, այլև ամբողջ երկրում»,- ասաց Դավթյանը: