Տեսնում ենք, թե այլ երկրների դեսպաններն ինչեր են անում մեր երկրում. Հովիկ Աբրահամյանը դժգոհեց

Այսօր կառավարության նիստում էկոնոմիկայի նախարար Կարեն Ճշմարիտյանը ներկայացրեց  «ՀՀ  կառավարության և Չինաստանի Ժողովրդական Հանրապետության կառավարության միջև առևտրական ներկայացուցչությունների փոխադարձ հիմնման մասին» համաձայնագրի կնքման որոշման նախագիծը: Ըստ այդմ` ցանկանալով նպաստել երկու երկրների միջև առևտրատնտեսական հարաբերություններին, ձգտելով համաշխարհային տնտեսական համակարգին իրենց պետությունների տնտեսությունների ինտեգրմանը, ղեկավարվելով միջազգային իրավունքի հանրահայտ կանոններով և ՀՀ և Չինաստանի Ժողովրդական Հանրապետության ազգային օրենսդրություններով` հայկական կողմը Չինաստանի Ժողովրդական Հանրապետության տարածքում կարող է հիմնել ՀՀ առևտրական ներկայացուցչություն, իսկ չինական կողմը ՀՀ-ում կարող է հիմնել Չինաստանի Ժողովրդական Հանրապետության առևտրական ներկայացուցչություն: Յուրաքանչյուր կողմ, իր պետության գործող օրենսդրության համաձայն, ֆինանսավորում է իր առևտրական ներկայացուցչության գործունեության հետ կապված ծախսերը:

Հովիկ Աբրահամյանը հարց ուղղեց Կարեն Ճշմարիտյանին, թե Հայաստանը քանի՞ երկրում ունի առևտրական ներկայացուցչություն:

«Առևտրական ներկայացուցչի հաստիք ունենք ԵՄ-ում, Բելգիայում, ԱՄՆ-ում, ԱՀԿ-ում, Ռուսաստանում: Սա, փաստորեն, Չինաստանում առևտրի հետագա աշխուժացման համար կարևոր խնդիր է լուծելու»,- ասաց նախարարը:

«Ես հենց դրա համար եմ հարցնում` մի  անգամ գոնե քննարկել. հարցրե՞լ եք, թե այդ առևտրի ներկայացուցիչները ինչով են զբաղված, ի՞նչ արդյունք են տվել: Ընդհանրապես, ուրիշ երկրի դեսպաններին տեսնում ենք` ամբողջ օրը կառավարություն են գնում, նախարարություններ  են գնում, փորձում են ներդրումներ տանել, իրենց երկրում տնտեսության ակտիվացմանն են նպաստում: Դրա համար մի անգամ գոնե պետք է լսել, հասկանալ` այդ մարդիկ գոնե ինչ-որ բանով օգնո՞ւմ են, թե՞ ոչ»,- ասաց վարչապետը:

Կարեն Ճշմարիտյանը պատասխանեց, որ Հայաստանը ներկայացնող առևտրի ներկայացուցիչները պարբերաբար հաշվետվություններ են ներկայացնում, սակայն Մոսկվայում առևտրի ներկայացուցչի հաստիքը կա, բայց ներկայացուցիչ չկա:

«Բա ինչի՞ ենք էդ հաստիքները ֆինանսավորում, եթե ներկայացուցիչ չկա»,- հարցրեց վարչապետը:

Նախարարն էլ պատասխանեց, որ եթե հաստիքը զբաղեցնող չկա, ուրեմն չեն ֆինանսավորում:

Վարչապետը կրկին խնդրեց հաստակեցնել. «Նախարարությունները, որ հաստատում են հաստիքացուցակը, բյուջեից էլ փող է հատկացվում, ուրեմն ինչի՞ մասին է խոսքը, փողը տրվում է, ոնց չի տրվում»:

Ապա Հովիկ Աբրահամյանը դիմեց ֆինանսների նախարար Գագիկ Խաչատրյանին: «Մի հատ, պարո\'ն Խաչատրյան, կնայեք, կասեք` քանի տեղ նման հաստիք կա: Ամեն դեպքում` ես ուզում եմ, որ էդ մարդիկ գործ անեն, նույնը` և Հայաստանի դեսպանները: Նրանք պետք է օգնեն,  ներդրում բերեն, ներդնողներ բերեն,  նպաստեն տնտեսական ակտիվացմանը: Մենք տեսնում ենք, թե այլ երկրների դեսպաններն ինչեր են անում մեր երկրում»,- սրտնեղեց Հովիկ Աբրահամյանը: