Բժշկից լավ ժողովրդի «պուլսը» որևէ պաշտոնյա չի կարող զգալ. Աշոտ Կուրղինյան

Գյումրու խնդիրների, դրանց լուծման մեխանիզմների, ինչպես նաև առաջիկա ՏԻՄ ընտրությունների ու Գյումրիում տիրող ընդհանուր մթնոլորտի մասին Yerkir. am-ը զրուցել է Գյումրու ավագանու ընտրություններում ՀՅԴ ցուցակը գլխավորող, Գյումրու «Մոր եւ մանկան ավստրիական հիվանդանոց»  ՓԲԸ-ի գործադիր տնօրեն /1995թ.-ից/, վիրաբույժ Աշոտ Կուրղինյանի հետ:

-Պարո´ն Կուրղինյան, հաշվի առնելով նախընտրական Գյումրու առանձնահատկությունները, նախ կցանկանայինք, որ ներկայացնեիք, թե այս պահին ի՞նչ տրամադրություններ են քաղաքում, մանավանդ, ի տարբերություն նախորդ ընտրությունների, առաջին անգամ են այս ընտրակարգով ընտրություններ անցկացվում, եւ առաջադրված կուսակցություններն էլ բավականին շատ են:

- Գյումրիում, բառի բուն իմաստով, արդեն նախընտրական իրավիճակ է՝ շատ ակտիվ, շատ աշխույժ: Երևի այս հանգամանքը մի քիչ էլ գալիս է մեր` տեղի ժողովրդի տարբերվող մենթալիտետից: Միշտ ասում են, չէ՞, որ Գյումրին ընդդիմադիր քաղաք է: Բայց ես այդպես չէի ասի, այդպիսի որակավորում չէի տա: Պարզապես գյումրեցիներն իրենց հույզերը՝ լինի դժգոհություն, ուրախություն, ավելի ակտիվ, ավելի ցցուն ձևով են արտահայտում: Կա նաև այն հանգամանքը, որ քաղաքականության առումով էլ, ցավոք, ավելի տուժված ենք, մի քիչ ավելի հալածված: Մյուս կողմից էլ` կարող եմ նշել, որ չարաշահվում է գյումրեցու բնավորությունը, և տարբեր ձևով փորձում են խաղալ գյումրեցու հույզերի հետ: Գիտեք, որ մեծ թվով տնակներ կան մեզ մոտ: Եթե չեմ սխալվում` միայն մեզ մոտ են մնացել այդ տնակներից, Վանաձորում, կարծեմ, այլևս չկան, և այս ամենը շահարկվում է քաղաքական տարբեր ուժերի կողմից՝ ում ինչպես հարմար է: Սա տալիս է այն արդյունքը, ինչը մենք հիմա ունենք: Շահարկելու գործընթացում խաղարկվում է ամեն ինչ` պետական իշխանական ինչ-որ փոքր կամ մեծ հնարավորություններ, լծակներ, ինչպես նաև կրիմինալը: Կրիմինալ ասելով` նկատի ունեմ տարբեր գործընթացներին փողոցի խուժանին մասնակից դարձնելը, որին, ի դեպ, ոստիկանությունը, երբ ցանկանա, կլռեցնի:

-Նման պայմաններում բժիշկ Կուրղինյանը ինչպե՞ս է կարողանում ճիշտ վերլուծել եւ գնահատականներ տալ իրավիճակին: Ի վերջո, ձեր մրցակիցները քաղաքականության մեջ եփված մարդիկ են: Այլ հարց է` դա լավ է, թե` վատ:

- Առօրյայում տարբեր մարդկանց հետ շփվելով`տեսնում եմ բաներ, որոնք, մեծ հաշվով, շատ օտար չեն ինձ, որովհետև ակտիվ մասնակից եմ եղել հասարակական կյանքին, ապրել եմ այս ամենով, բայց նաև կան պահեր, որ, այո, զարմանում եմ, պետք է խոստովանեմ:  Բայց զարմանքս ինձ չի ընկճում, այլ հակառակը` մի տեսակ ավելի շատ եմ շահագրգիռ դառնում, որովհետև մտել եմ մի շրջապտույտի, մի գործընթացի մեջ, որում պետք են առողջ մարդիկ: Մեծամտություն չթվա, բայց ես մեր հասարակության ու շարքային քաղաքացիների ցավով ապրող մարդ եմ ու չեմ կարողանում անտարբեր լինել, և եթե այնպես է ստացվել, որ իմ ոչ անտարբերությունը, հետաքրքրվածությունն այս գործընթացների մեջ պետք է դրսևորվի այս ձևաչափով, ապա ես պատրաստ եմ: Սա ինձ համար նաև առիթ է` այս տարիների ընթացքում իմ մեջ կուտակված որոշ հարցերին, տեսածս խնդիրներին, անարդարություններին լուծում տալու համար: Ինչպե՞ս կստացվի, կախված է մեզանից` թե ինչպես հասանելի կդարձնենք մեր խոսքը: Ինչ վերաբերում է իմ մասնագիտությանը, ապա ասեմ, որ բժշկից լավ հասարակության տրամադրությունը, գանգատները, բողոքները, բժշկական լեզվով ասած` «պուլսը» որևէ պաշտոնյա չի կարող ավելի լավ իմանալ: Ես չեմ ուզում մյուսներին նսեմացնել, բայց բժիշկն իր մասնագիտության շնորհիվ շփվում է հասարակության բոլոր խավերի հետ և հասարակության տրամադրություններն ուղղակի զգում է իր մասնագիտության մեջ: Եթե այս ամենը դու գիտես, կարող ես քո լուծումներն առաջարկել թիմակից ընկերներիդ հետ:

- Ի՞նչ թիմով եք գնում ընտրությունների: Ինչո՞ւ գյումրեցին պիտի իր քվեն վստահի հենց ՀՅԴ-ի կողմից առաջադրված` ավագանու թեկնածուներին:

- Եթե մենք, ձեռքներս ծալած, նստենք և դուրս չգանք ՀՅԴ-ի Գյումրու մեր գրասենյակից, ապա, այո՛, մեզ վստահելու հիմք չի լինի: Մենք առօրյայով ենք ապրում եւ ապրելու, դրա համար էլ փորձելու ենք, անելու ենք այն, ինչը հիմա անում ենք: Հատկապես այս ընտրություններում ավագանու կազմը վերջնականապես հաստատելուց առաջ ունեցել ենք մեկ ձգտում՝ շարքային քաղաքացիներին՝ գյումրեցիներին, ցույց տալ, որ փակ կառույց չենք, որ մենք` որպես ազգային կուսակցության ներկայացուցիչներ, հետաքրքրված ենք ամեն ինչով, ոչ միայն Հայ դատը կամ Արցախի ու Ջավախքի խնդիրներն են մեզ համար էական, այլև մեզ համար հավասար խնդիր է Գյումրիում տնակում ապրող քաղաքացու մտահոգությունը: Սա մենք ուզում ենք մեր առաջին ուղերձը դարձնել և, դրանից ելնելով էլ, մեր ավագանու կազմը որոշեցինք: Մեր ցուցակի երկրորդ անդամը կուսակցական չէ, երրորդ անդամը` նույնպես  սա եւս ինչ-որ բանի մասին է, չէ՞ ,խոսում: Մեկը գիտության մարդ է, մյուսը՝ մշակույթի, քաղաքում շատ ճանաչված անձինք են: Մեր ցուցակում մարդիկ են, ովքեր իրենց ոլորտի, ինչպես նաև ամբողջ քաղաքի խնդիրներին ծանոթ են, և սա նույնպես ուղերձ է ընտրողին, որ մենք փակ չենք, մենք կուսակցական խմբավորում չենք, մենք իրենց նման ենք, ոչ մի բանով չենք տարբերվում Գյումրիում ապրող ցանկացած սովորական մարդուց:

- Ինչպե՞ս եք կարողանալու անկեղծորեն բացատրել տնակում ապրող մարդուն, որ, իրոք, իրավիճակ է քաղաքում փոխվելու, որովհետև դա բարդագույն խնդիր է: Ունենալ տեսլականներ, խնդիրների լուծման մեխանիզմներ` մեկ բան է, բայց կարողանալ համոզել մարդուն` չափազանց բարդ է:

- Շատ ճիշտ եք ասում, որովհետև հենց հիմա այդ տնակում դժվարությամբ ապրող մարդու հույզերը շահարկվում են ավելի պրիմիտիվ ձևով` նրան ուղղակի գումար տալով, նրա տնակի դիմացի փոսը լցնելով, կես բեռնատար խճավազով, և այդ մարդուն այդ պահի դրությամբ դրանով բավարարեցնելով: Ու դու իրականության մեջ չես կարող այդ մարդու հետ բարձր թեմաներից խոսել, բայց այլընտրանք էլ չկա: Մեր միակ հույսը փորձն է` նրանց մտածելակերպի վրա ազդել: Չգիտեմ, թե ինչքանով կհամոզվի: Դժվար է լինելու, որովհետև ինչքան տնտեսապես, բարոյապես խեղճացած և ընկճված մարդկանց հետ ես գործ ունենում, այնքան քո աշխատանքի մեթոդները, քո աշխատանքի մոտեցումները, եթե հիմնված են զուտ տեսական ճշմարտությունների վրա, դժվար են ընկալվում: Նման մարդիկ ինչ-որ պրակտիկ բաներ են ուզում: Գործող քաղաքապետը հեռուստատեսությամբ հայտարարում է` եկեք, հինգ-հինգ հարյուր հազար դրամ գումար դնենք, առաջինը ես եմ դնում, մնացած տասը կուսակցություններդ էլ դրեք, մի հոգու համար բնակարան գնենք: Եվ պատկերացրեք տնակում նստած մարդու արձագանքը: Այսպես աշխատում են մարդկանց հույզերի վրա: Սա է իրավիճակը, սիրուն չէ, չես էլ կարող ասել` մի´ արեք, բայց սա վառ օրինակ: Հակառակը պետք է խոսել` թե այդ ինչպե՞ս է ստացվել, որ Գյումրիում հիմա շատ տների վրա գրված է` վաճառվում է, այս խնդիրների մասին է անհրաժեշտ խոսել:

- Տնակների հարցը Գյումրիում, կարծես, հավերժական խնդիր է: Դրա լուծումն առաջարկելո՞ւ եք գյումրեցիներին:

- Այո, իհարկե, առաջարկելու ենք: Տնտեսագետների հետ ենք խորհրդակցել: Մեծ հաշվով` պետությունն իր ասելիքը պետք է ասի, համայնքն իր ասելիքը պետք է ասի, պետք է փորձենք տարբեր միջոցներով, պետական ներդրումներով և արդար ձևով այս խնդրին լուծում տալ: Խնդիրը լուծելի է: Տնակների քանակի շատությունը Գյումրիում ունի նաև իր սուբյեկտիվ բացատրությունը: Ավելի մանրամասն կներկայացնենք քարոզարշավի ժամանակ: Գիտե՞ք, այնպես չէ, որ ոչինչ չի արվում, ուղղակի տեմպերը գոհացուցիչ չեն, կարելի է ամեն ինչ ավելի լավ անել, կարելի է ամեն ինչ փոխել, կարելի է ընդհանուր մթնոլորտն ու աշխատանքին մոտենալու սկզբունքները փոխել: Ես մի բանում վստահ եմ՝  նոր ընտրակարգը շատ լավն է, որովհետև տրվեց հնարավորություն թիմով հանդես գալու և մտնելու ավագանի: Այդպես ընտրված ավագանին նախաձեռնող կլինի, տարբեր մտահոգ անձանցով համալրված կլինի, տեղի կունենա տարբեր հայացքների բախում, որի արդյունքում գործ կարվի: Մենք հիմա ունենք սովորություն, որ մարդը ավագանի է ընտրվում` իր անձնական շահերից ելնելով, իր համար ինչ-որ խնդիրներ լուծելու համար: Այս արատավոր գործընթացի մեջ մտնելով` ավագանու անդամը չի կարող քաղաքի խնդիրները լուծել, բայց երբ քաղքական ուժերը մտնեն պայքարի մեջ, քաղաքական պատասխանատվություն կլինի, և այդպես մթնոլորտ կփոխվի:

- Պարո´ն Կուրղինյան, ՀՅԴ-ՀՀԿ քաղաքական համագործակցությունը շատ հաճախ սխալ է մեկնաբանվում քաղաքական ուժերի կողմից, եւ դա սև քարոզչության մաս են դարձնում: Ի՞նչ եք անելու և ինչպե՞ս եք անելու, որ գյումրեցին ձեզ ճիշտ ընկալի::

- Եթե ակտուալիզացնենք և այսօրվա համար խոսենք, ապա ամենակարևորը հենց այս ՏԻՄ ընտրություններում Գյումրիում ուրույն դեմք ցույց տալն է, մենք չենք վախենալու քննադատելուց,  երևույթներն իրենց անուններով կոչելուց` այդ երևույթների կրողը ՀՀԿ-ի թեկնածուն լինի,  թե` նա չլինի: Բայց, մյուս կողմից, միանշանակ սև փիառով չենք զբաղվելու, անձնական վիրավորանքներ չենք տալու, դա ՀՅԴ-ին երբեք բնորոշ չի եղել: Նորմալ, մտածող մարդը, տեսնելով, որ դու բաց տեքստով խոսում ես երևույթների մասին, որի կրողը նաև իշխող ՀՀԿ-ն է, կհասկանա ամեն ինչ:

Այսօր ունենք հենց Գյումրու այս ընտրությունների համար ստեղծված կեղծ կուսակցություններ, որոնց նպատակը միայն Գյումրու այս ընտրություններն են: Այդ տարաբնույթ` փոքր կամ մեծ կուսակցությունները ստեղծվել են ձայները փոշիացնելու համար…

-Օրինակ` գործող քաղաքապետ Սամվել Բալասյանի ստեղծած  «Գյումրեցու ոգին» կուսակցությունը:

-Դուք երեւի ավելի լավ եք տեղեկացված:

- Ձեր կարծիքով` վիրահատական միջոցների անհրաժեշտություն կլինի՞ Գյումրիում` թե՛ ընտրական գործընթացում ու ընտրության օրը, թե\' ընտրություններից հետո:

- Ամեն ինչի պետք է պատրաստ լինես, որովհետև երբ վիրահատական միջամտություն ես առաջարկում կամ փորձում ես անել, գիտես, որ դա ստեղծում է սթրեսային վիճակ,  և նախ` դա սթրես է նրա համար, ում համար անում ես այդ վիրահատությունը: Հաճախ վիրահատությունը հարթ է ընթանում, և ամեն խնդիր լուծվում է: Եթե նույնիսկ վիրահատական միջամտություն լինի, ապա թող դա ավարտվի` վնասված օրգանը վիրահատական միջամտությամբ բուժելով:

Զրուցեց Ամալյա Առաքելյանը