Բժշկից նախապես վերցրել են սուրը և նրան հանձնել ոստիկան-զինվորների ծեծին ու տանջանքներին

Ծնվել է 1880/82 թ., Սեբաստիայի նահանգի կենտրոն Սեբաստիա քաղաքում /նույն նահանգի Եվդոկիայի գավառի Զիլե ավանում՝ բրուտ Կարոյեան Գասպարի ընտանիքում:

Նախնական կրթությունն ստացել է Սեբաստիայի ազգային վարժարանում, միջնակարգը՝ քաղաքի ավետարանականների վարժարանում:

1903-07 թթ. սովորել է Բեյրութի Ամերիկյան համալսարանի բժշկական ֆակուլտետում և բժշկի վկայական ստացել: Ըստ Արշակ Ալպոյաճյանի՝ բժշկական կրթությունն ստացել է 1891 թ. ԱՄՆ-ում:

1907 թ. վերադառնալով Սեբաստիա՝ բժիշկ է աշխատել: Հետագայում աշխատել է Զիլեում: Եղել է ՀՅԴ անդամ:

1914 թ., Առաջին համաշխարհային պատերազմի ժամանակ զորակոչվել է օսմանյան բանակ և իբրև, պահեստային զինվորական բժիշկ՝ թողնվել ծառայելու Եվդոկիայում:

1915 թ. Եվդոկիայում Շուուբե րեիսի («[Զինվորագրության] բաժնի պետ») Քեոր բինբաշիի («Կույր մայոր») հրամանով ձերբակալվել է և բանտարկվել:

Մերժել է իսլամություն ընդունել և ճաշակել է բանտի դառնությունները: Որոշ ժամանակ անց, նույն հրամանատարի հրամանով, ազատվել է:

Բանտից դուրս գալուց և իր զինվորական համազգեստը վերստանալուց անմիջապես հետո, Սեբաստիայի հայ բնակչության տեղահանության ժամանակ, Եվդոկիայի ճանապարհին, ընտանիքի անդամների աչքի առաջ, եղբոր հետ միասին սպանվել է Քեոր բինբաշիի հրամանով՝ մոտ 35 տարեկանում: Նախապես բժշկից վերցրել են սուրը և նրան հանձնել ուղեկցող ոստիկան-զինվորների ծեծին ու տանջանքներին:

Մեկ այլ տվյալով՝ Եվդոկիայում կախաղան է հանվել իր երկու հայ բժիշկ պաշտոնակիցների՝ Միսաք Փանոսյանի և մարզվանցի Հակոբ Էմինյանի հետ միասին:

Մինասյան Հ., Օսմանյան կայսրությունում, Թուրքիայի Հանրապետությունում և հարակից տարածքներում բռնաճնշումների և ցեղասպանության ենթարկված հայ բժիշկներ: Համառոտ կենսագրական բառարան, Երևան, 2014, 519 էջ, էջ 308–309: