Թուրքիայի կառավարության նիստում քննարկվելու է Գերմանիային պատասխանելու հարցը

Վարչապետ Բինալի Յըլդըրըմի նախագահությամբ` Չանքայա պալատում մեկնարկել է թուրքական կառավարության նիստը: Քննարկումների օրակարգում, ըստ թուրքական լրատվամիջոցների,  ներքաղաքական խնդիրներից լինելու է քրդերի դեմ պայքարի հարցը, իսկ արտաքին քաղաքական հարցերից՝ Բունդեսթագի ընդունած Ցեղասպանության բանաձևը:

Ըստ Ermenihaber-ի՝ մինչ Թուրքիայի արտգործնախարարությունը կկազմի գործողությունների ծրագիր` կառավարության նիստում հստակեցվելու են Գերմանիայի հետ հարաբերություններում արվելիք քայլերը: Սեղանին է դրված Ադանայում գտնվող Ինջիրլիքի ռազմաբազայի հարցը, որից օգտվում են գերմանական կործանիչները: Հայտնի է, որ Գերմանիան ցանկություն է հայտնել առավել լայնորեն օգտվել նշյալ ռազմաբազայից: Այդ հարցով հիմա բանակցությունների մեջ են Թուրքիայի պաշտպանության և արտաքին գործերի նախարարությունները: Կառավարության նիստում քննարկվելու է Գերմանիային պատասխանելու հարցը:

Նշենք, որ թուրքական Ինջիրլիք ռազմաբազայում գտնվող գերմանական կործանիչները «Իսլամական պետություն» ահաբեկչական կազմակերպության դեմ պայքարի շրջանակներում ռազմաբազայից թռիչքներ են իրականացնում դեպի Սիրիա և Իրաք: Ինջիրլիքում գտնվող գերմանական ինքնաթիռների մի մասն էլ հետախուզական թռիչքներ է իրականացնում` փախստականներին Եվրոպա տեղափոխող խմբերին հայտնաբերելու նպատակով: