Այսօր երկիրը պահողը հողն է և այդ հողի վրա ապրող ու արարող ժողովուրդը. Լևոն Մկրտչյան

Կրթության և գիտության նախարար Լևոն Մկրտչյանը Հայաստանի ազգային ագրարային համալսարանում ներկա է գտնվել ագրոբիզնեսի ֆակուլտետի` 2015-16 ուսումնական տարվա բակալավրիատի և մագիստրատուրայի միջազգային  ծրագրով  շրջանավարտների դիպլոմների հանձնման և Երևանի (Ի-Վի-Էն) գինու ակադեմիայի առաջին ավարտական արարողությանը:

Շնորհավորելով  բուհի ագրոբիզնես միջազգային կրթական ծրագրի շրջանավարտներին՝  նախարարը շեշտել է, որ պահը հուզիչ է նաև իր համար:

«Հիշում եմ, թե  17 տարի առաջ  ինչպես  ստեղծեցինք այս կենտրոնը, որն այն ժամանակ Հայաստանում միջազգային կրթական ծրագիր իրականացնելու առաջին ջանքն էր: Միջազգային կրթական ծրագրի  իրագործումը մեր երկրի, ժողովրդի և պետության համար հեռանկարային գյուղատնտեսության ոլորտում խիստ կարևոր  է: 21-րդ դարում մեր պետության առջև կանգնած մարտահրավերներն անընդհատ աճում են և այսօր երկիրը պահողը հողն է և այդ հողի վրա ապրող ու արարող ժողովուրդը: Այս իմաստով գյուղատնտեսության ոլորտի յուրաքանչյուր մասնագիտություն  ամրացնում է երկրի անվտանգությունը,  կապում ժողովրդին  իր հայրենիքի ու հողի հետ»,- նշել է նախարարը՝  ագրոբիզնեսի միջազգային  ծրագրի իրագործման համար շնորհակալություն հայտնելով նաև միջազգային կառույցներին, որոնք աջակցել են կրթական նախաձեռնության իրագործմանը:
Հիշատակելով, որ ծրագիրն  իրագործվել  է ԱՄՆ Տեխասի  համալսարանի հետ  համատեղ՝  նախարարը  հույս է հայտնել, որ միջազգային կապերը  կնպաստեն  հայկական ագրոարտադրանքների արտահանմանը և միջազգայնացմանը:

Լևոն Մկրտչյանն  առանձնահատուկ  շնորհավորել է Երևանի (Ի-Վի-Էն) գինու  ակադեմիայի առաջին շրջանավարտներին՝  շեշտելով, որ գինեգործությունը հայկական մշակույթի կարևոր բաղադրիչն է:

«Մեր երկիրը գինու բնօրրաններից մեկն է, և գինեգործության լավագույն ավանդույթների վերականգնումն ու միջազգային չափանիշներին համապատասխանող  մասնագետների պատրաստումը  նշանակում է բացել մի նոր ճանապարհ՝  դեպի մեր  ժողովրդի հիշողությունը: Գինին ոչ միայն արգրոարտադրանք է, այլ նախևառաջ  մշակույթ և աշխարհընկալում: Յուրաքանչյուր սերունդ իր պետության առջև պարտավորություն ունի՝ ժառանգելով  իրենից հետո թողնել ավելի մեծ արժեքներ: Դուք ստացել եք լավագույն կրթությունը, ունեք հնարավորություն  կայանալու և  շարժվելու առաջ՝  սխալվելու և ձեր ճշմարտությունը գտնելու իրավունքով»,-  դիմելով շրջանավարտներին ասել է ԿԳ նախարարը ՝  ավելացնելով, որ իրենց հաջողությունները  միաժամանակ  բուհինն  ու երկրինն  են:

Միջոցառմանը մասնակցել և շրջանավարտներին շնորհավորել են նաև ՀՀ-ում Գերմանիայի դեսպան  Մաթիաս  Քիսլերը,  ՀՀ-ում  ԱՄՆ  փոխդեսպան Քլարկ  Փրայսը, Տեխասի Էյ ընդ  Էմ  համալսարանի  պրոֆ.  Ջոն Նիքըլսը, ՀԱԱՀ  հոգաբարձուների  խորհրդի  նախագահ  Սամվել Սարգսյանը,  ՀՀ գյուղատնտեսության  փոխնախարար Արմեն Հարությունյանը:

ՀՀ ԿԳՆ