«Արարող սերունդը»՝ «Տարվա լավագույն երիտասարդական նախաձեռնություն» անվանակարգի հաղթող

Համազգային վստահության խորհրդի կողմից անցկացվող «Համաժողովրդական վստահություն. Ոսկե դափնի» ամենամյա մրցանակաբաշխության շրջանակում, մարտի 3-ին, «Տարվա լավագույն երիտասարդական նախաձեռնություն» անվանակարգում հաղթող է ճանաչվել «Արարող սերունդ» նախաձեռնությունը։  

«Արարող սերունդ» նախաձեռնության համահիմնադիր Հասմիկ Ափյանը, շնորհակալություն հայտնելով Համազգային վստահության խորհրդին՝ նախաձեռնության աշխատանքը բարձր գնահատելու համար, նշել է, որ այս մրցանակին արժանանալն իսկապես պարտավորեցնող է և վստահեցրել, որ շարունակելու են անել հնարավորը՝ հայի ինքնության պահպանման, ինչպես նաև Հայաստանի առաջընթացի համար անհրաժեշտ նախադրյալների ստեղծման ու ամրապնդման բարդ և պատասխանատու առաքելությանը հավուր պատշաճի մասնակցություն ունենալու պատվաբեր գործում։

Հարկ է նշել, որ «Արարող սերունդ» նախաձեռնությունը մի տանիքի տակ է համախմբել ակտիվ, բանիմաց ու հայրենասեր երիտասարդների, ովքեր իրենց ամենօրյա աշխատանքի և գործունեության հիմքում դրել են Հայաստանի անվտանգ ու խոստումնալից ապագայի կերտման հիմնանպատակը։