Ադրբեջանի համար տարածքներ նվաճելու հարց է, Հայաստանի համար՝ կյանքի իրավունքի. Խոսրով Հարությունյան

Այսօր «Ռուսաստանի միջնորդության հեռանկարները Լեռնային Ղարաբաղի հակամարտության կարգավորման հարցում» թեմայով` Երևան–Մոսկվա–Բաքու տեսակամուրջ-քննարկման ժամանակ ԱԺ պատգամավոր Խոսրով Հարությունյանը ներկայացրեց իր տեսակետները Ռուսաստանի միջնորդ դերի մասին:

Նշենք, որ հեռուստակամրջին մասնակցում էին Ադրբեջանի Միլի մեջլիսի պատգամավոր, քաղաքագետ Ռասիմ Մուսաբեկովը և Բաքվի բազմամշակութայնության միջազգային կենտրոնի խորհրդական, քաղաքագետ Թոֆիկ Աբասովը:

Խոսրով Հարությունյանի խոսքով՝ հաշվի անելով այն հանգամանքը, որ Հարավային Կովկասը գտնվում է Ռուսաստանի աշխարհաքաղաքական հետաքրքրությունների շրջանակում, ապա նրա միջնորդ դերը բնական է թե' Հայաստանի, թե' Ադրբեջանի համար: Իհարկե, ըստ պատգամավորի, դա չի կարող բացառել այլ միջնորդների ջանքերն ու կատարած աշխատանքը:

«Միևնույն ժամանակ, եթե խոսում ենք միջնորդ դերի մասին, պետք է հասկանանք` ո՞րն է այդ դերը: Ռուսաստանն անում էր ամեն ինչ, որ կողմերի միջև ռազմական հավասարակշռությունը պահպանվեր, բայց պարզվեց, որ դա քիչ է: Այս ռազմական լարվածության մեծացումը շփման գծում կարող է վերածվել մեծ աղետի ոչ միայն կողմերի, այլ նաև տարածաշրջանի համար, ահա թե ինչու շատ կարևոր է խաղաղություն հաստատելու` միջնորդության դերը:

ԼՂ խնդիրը Ադրբեջանի համար տարածքներ նվաճելու հարց է, իսկ Հայաստանի համար` կյանքի իրավունքի: Այ այստեղ է, որ մենք իրար չենք հասկանում, և միջնորդները պետք է առավել ջանքեր գործադրեն, որովհետև գիտենք, թե որ կողմն է առավել խախտում հրադադարը»,- ասաց Խոսրով Հարությունյանը: