Ինչո՞ւ է դատարանը վերադարձրել ծննդկան Մերի Մարգարյանի մահվան դեպքով հարուցված գործը

Դեռևս մայիսի 17-ին Շենգավիթ վարչական շրջանի ընդհանուր իրավասության դատարանի վարույթ էր ընդունվել ծննդկան Մերի Մարգարյանի մահվան փաստի կապակցությամբ  հարուցված` «Շենգավիթ» բժշկական կենտրոնի մանկաբարձ գինեկոլոգներ Շուշանիկ Բախշյանի և Անժելա Աբելյանի վերաբերյալ քրեական գործը: Սակայն դատական տեղեկատվական համակարգից տեղեկացանք, որ  երեկ, նույն դատարանի որոշմամբ, գործը վերադարձվել է մեղադրողին:

Yerkir.am-ի հետ զրույցում Մերի Մարգարյանի իրավահաջորդի ներկայացուցիչ Մարինե Թովմասյանը հայտնեց, որ ընդամենը մեղադրանքի հետ կապված տեխնիկական հարցեր կան` ճշգրտելու, որից հետո գործը կրկին կուղարկվի դատարան: Նշենք, որ գործը մեղադրողին վերադարձնելու համար դատարանը հիմք է ընդունել ՀՀ քրեական դատավարության օրենսգրքի 296-րդ հոդվածը:

Համաձայն հիշյալ հոդվածի 1-ին կետի` գործը մեղադրողին վերադարձնելու մասին որոշում դատավորը կայացնում է այն դեպքում, երբ մեղադրական եզրակացությունը չի համապատասխանում սույն օրենսգրքի պահանջներին, կամ արարքի իրավաբանական որակումը չի համապատասխանում արարքի նկարագրությանը կամ չի բխում գործում առկա ապացույցներից:

Նույն հոդվածի 2-րդ կետն էլ սահմանում է` գործը մեղադրողին վերադարձնելու մասին որոշման մեջ, բացի նման որոշում կայացնելու հիմքերից, նշվում է այն ժամկետը, որի ընթացքում դատախազը պետք է վերացնի մեղադրական եզրակացությունում առկա թերությունները: Եթե մեղադրյալը գտնվում է կալանքի տակ, նշված ժամկետը չպետք է 3, իսկ մնացած դեպքերում` 7 օրվանից ավելի լինի: