Առանց նախագահի էլ երկու տարի է` աշխատում են

Այսօր ԱԺ-ում, ուր քննարկվում էր 2015թ. բյուջեի կատարողականը, հաշվետվություն ներկայացրեց ԱԱԽ աշխատակազմի ֆինանսական բաժնի պետ Արմեն Մամիկոնյանը:

«Ժառանգություն» խմբակցության անդամ Թևան Պողոսյանը հարց ուղղեց, թե ինչպե՞ս է գնահատվում ԱԱԽ աշխատանքը` առանց ԱԱԽ նախագահի պաշտոն ունենալու, և այդ ընթացքում ԱԱԽ նախագահի թափուր պաշտոնի համար նախատեսված աշխատավարձը ո՞ւր է ուղղվել: ԱԱԽ ներկայացուցիչը պատասխանեց, թե վերադարձվել է 48 միլիոն դրամ, սակայն տնտեսում չի եղել, այլ աշխատանքների օպտիմալացում:

Նա հավելեց, որ ԱԱԽ-ն շարունակում է իրականացնել իր գործառույթները, այն է՝ ներքին և արտաքին սպառնալիքների կանխարգելում և վերացում, հասարակության անվտանգության աշխատանքների իրականացում:

ՀԱԿ խմբակցության անդամ Գագիկ Ջհանգիրյանը տեղից արձագանքեց, թե, փաստորեն, լավ էլ աշխատում է ԱԱԽ-ն՝ առանց նախագահի:

Նշենք, որ ԱԱԽ նախագահի պաշտոնը մոտ երկու տարի է՝ թափուր է: