Վստահության մեխանիզմներ պետք է ստեղծել. Սեյրան Օհանյան

Այսօր կառավարությունում լրագրողների հետ զրույցում ՀՀ պաշտպանության նախարար Սեյրան Օհանյանն անդրադարձավ Վիեննայում ձեռք բերված պայմանավորվածությանը:

«Բանակցային գործընթացում հաջողության հասնելու առաջին նախապայմանը արդեն իսկ համապատասխան իրավիճակ ստեղծելն է, վստահության մեխանիզմներ պետք է ստեղծել»,- հայտարարեց նախարարը եւ նշեց, որ վստահության մեխանիզմները երկու ուղղությամբ պետք է ձեւավորվեն. առաջինը ՝ պետք է զերծ մնալ բոլոր տեսակի խախտումներից` կրակոցներ, դիվերսիոն հարձակումներից, նաեւ միջազգային հետաքննության մեխանիզմներ իրականացնել:

«Մենք միշտ կողմնակից ենք եղել դրան: Վերջին բանակցությունների ժամանակ կարծես այդ ամենը ձեռք է բերվել»,- ասաց նա:

Խոսելով բանակում վերջերս մահացած զինծառայողի հոր այն հայտարարության մասին, թե որդին ոչ թե ինքնասպան է եղել, այլ սպանել են, որովհետեւ փորձել է կանխել բանակում բենզինի գողությունը, նախարարը նշեց, որ հարուցված է քրեական գործ, և իրավապահները գնահատական կտան: Նա նշեց, որ չունի տեղեկություն, թե բենզինի գողության դեպք է եղել: