Որեւէ մեկը ԼՂ ժողովրդին չի կարող բացատրել` ինչու Արեւելյան Թիմորի կամ Կոսովոյի ժողովուրդն իրավունք ունի ինքնորոշվելու, իսկ իրենք` ոչ. Շարմազանով

Այսօր ՀՀԿ ԳՄ նիստից հետո լրագրողների հետ զրույցում ՀՀԿ խոսնակ, ՀՀ ԱԺ փոխնախագահ Էդուարդ Շարմազանովը ասաց, որ նիստին քննարկվել են ներքին եւ արտաքին քաղաքական խնդիրները եւ ուշադրության կենտրոնում է եղել Ղարաբաղյան հիմնահարցը:

Լրագրողները հարց տվեցին ԼՂՀ անկախության ճանաչման վերաբերյալ ՀՀ պաշտոնական դիրքորոշման  առնչությամբ:

«Հայաստանի Հանրապետության հստակ արտահայտած կարծիքը առ այն, որ Հայաստանը կճանաչի ԼՂՀ-ն, եթե Ադրբեջանը պատերազմ սկսի,  մնում է ուժի մեջ: Մենք կողմ ենք բացառապես խաղաղ կարգավորմանը:  Մենք չենք ուզում պատերազմ, բայց եթե Ադրբեջանը փորձի ռազմական ճանապարհով, ահաբեկչական ճանապարհով լուծել ԼՂ խնդիրը, եթե փորձեն նոր պատերազմ հրահրել ԼՂ ազատատենչ ժողովրդի նկատմամբ, ՀՀ-ն կիրականացնի այն քայլերը, որի մասին խոսեց հանրապետության նախագահը: Մենք Մինսկի խմբի համանախագահների ձեւաչափով բանակցություններ շարունակելու կողմնակից ենք, բայց գնդակը Ադրբեջանի դաշտում է:  Եթե գնում են դեպի պատերազմ,  մերժում են Մինսկի խմբի ձեւաչափը»,- նշեց  Շարմազանովը:

 Շարմազանովն անդրադարձավ նաեւ Սերժ Սարգսյանի կողմից բանակցությունները վերսկսելու 3 պայմաններին աշխարհի արձագանքին:

 «ՌԴ ԱԳ նախարար Լավրովն արդեն արձագանքեց մեր նախագահի ասածին: Նա նշեց, որ Ռուսաստանը կողմ է հետաքննութան եւ վստահության մեխանիզմների ներդրմանը, նշեց, որ խնդիրը չունի ռազմական լուծում: Իսկ Լավրովը երբ խոսում է, խոսում է միայն ՌԴ ԱԳ նախարար, այլեւ համանախագահ երկրներից մեկի ԱԳ նախարար: Իսկ սա նշանակում է, որ հայկական կողմերի առաջարկները  ընդհանուր առմամբ Մինսկի խմբի համանախագահ երկրների մոտ ունեն դրական ընկալում:

ՀՀ նպատակն է ԼՂՀ միջազգային ճանաչումը, եւ դրա համար Հայաստանն  անելու է բոլոր քայլերը, որ ԼՂՀ-ն լինի միջազգային սուբյեկտ: Դա է մեր նպատակը, եւ մենք դրան հասնելու ենք`  ուզեն  Արեւելքում,  չուզեն  Արեւմուտքում:

Ազգերի ինքրոշումը  ՄԱԿ-ի նպատակներից մեկն է, եւ որեւէ մեկը չի կարող Լեռնային Ղարաբաղի ժողովրդին բացատրել ,թե ինչու Արեւելյան Թիմորի ժողովուրդը 1999 թվականին ՄԱԿ-ի հովանու  ներքո պետք է կատարի ռեֆերենդում եւ առանձնանա Ինդոնեզիայից, իսկ ԼՂ ժողովուրդը, որ 91 թվականին իրականացրել է ռեֆերենդում, անջատվել է ԽՍՀՄ-ից, չի կարող իրականացնել  եւ ռեֆերենդումի միջոցով անկախանալ: Որեւէ մեկը չի կարող Եվրոպայում ԼՂ ժողովրդին բացատրել, որ Կոսովոյի բնակիչներն ավելի շատ  ինքնորոշվելու իրավունք ունեն, քան ԼՂ ժողովուրդը: Դրա համար մենք քայլ առ քայլ գնալու ենք դեպի այդ ճանապարհը»,- ասաց ՀՀԿ խոսնակը: