Որևէ իշխանություն իրավունք չունի անձնական նախաձեռնությամբ փորձել լուծել Արցախի հարցը, այն ժողովուրդն արդեն լուծել է. Ռուստամյան

Արցախի հետ կապված մեզ ստիպում է անհանգստանալ այն վիճակը, որ Ադրբեջանը շատ լավատեսական հայտարարություններ է անում, թե 2019 թվականին շատ մոտ են համաձայնության կնքմանը: Այս մասին այսօր կայացած ասուլիսում ասաց ՀՅԴ Բյուրոյի նախագահ Արմեն Ռուստամյանը:

«Մենք գիտենք, չէ՞, թե Ադրբեջանին ինչ պետք է բավարարի, որ իրենք գնան համաձայնության: Մեզ համար շատ հստակ է եղել այն կարմիր գիծը, որ մինչև հիմա, երբ որևէ իշխանության հետ ունեցել ենք որևէ համագործակցություն, փորձել ենք այդ իշխանությունների ձեռքով այդ կարմիր գիծը քաշել: Այդ հայտարարությանը, որ եղել է ադրբեջանական իշխանությունների կողմից, մեր իշխանությունները պետք է պատասխանեին` չի կարող լինել որևէ զիջում Հայաստանի կամ Արցախի կողմից, քանի դեռ Ադրբեջանը չի ճանաչել Արցախի անկախությունը»,- շեշտեց նա:

Ռուստամյանն արձանագրեց, որ այսօր Ադրբեջանը չի պատրաստվում ճանաչել Արցախի անկախությունը, բայց խոսվում է ինչ-որ համաձայնության հնարավորության մասին, այն էլ` թե շատ մոտ են տեսակետները: «Այստեղ ուրիշ բան չի մնում մտածելու, քան այն, որ կա'մ զիջում ենք, զիջում ենք այն տեսակետից, այն պլատֆորմից, որն Արցախի ժողովուրդն է  արձանագրել Սահմանադրության 175 հոդվածով, որի մասին անընդհատ խոսում ենք, կա'մ պատերազմական վիճակ պետք  է լինի, որովհետև ուրիշ տարբերակ չկա»,- ասաց նա:

Ըստ Ռուստամյանի` պատերազմն ավարտելու երկու ձև կա: «Կա'մ Ադրբեջանը համոզվում է, որ եթե պատերազմ սկսեց, ոչ թե 20 տոկոս կկորցնի, այլ ավելի շատ, և դրա համար չի հարձակվի, որովհետև վստահ չէ, որ այդ պատերազմում կհաղթի, ինչն էլ եղել է հիմնական զսպողը, կա'մ մենք հանձնվում ենք, որպեսզի պատերազմն ավարտվի: Մենք ասում ենք` եթե ուզում ենք  այս իրավիճակից արժանապատվորեն ելնել, պետք է ցույց տանք Ադրբեջանին, որ եթե նա նոր պատերազմ սկսի, այդ պատերազմը հօգուտ իրեն չի ավարտվելու: Ամբողջ հայությունը` Արցախ, Հայաստան, Սփյուռք, այդ ռազմաքաղաքական դաշինքի պաշտպանն է լինելու: Եվ մենք այդպիսի նախաձեռնություն առաջիկայում սկսելու ենք: Սրանք միայն խոսքեր չեն լինելու, փորձելու ենք այս գաղափարի շուրջ համախմբել ամբողջ հայությանը, և սա դառնա ազդակ բոլորի համար: Այստեղ իշխանությունների հարցը չէ: Որևէ իշխանություն իրավունք չունի անձնական նախաձեռնությամբ փորձել լուծել Արցախի հարցը: Արցախի հարցը ժողովուրդն արդեն լուծել է և շատ հստակ ասել է, թե ինչպես է պատկերացնում այդ հարցի լուծումը: Ցանկացած իշխանության պարտքն ու հանձնառությունն է, որ կատարի այդ կամքը: Իսկ այդ կամքը կատարելու համար պետք է ստեղծենք համապատասխան պայմաններ, որ Ադրբեջանն էլ հասկանա, որ այդ կամքն անքննելի և անվիճարկելի է»,- ասաց նա:

Իսկ թե ե՞րբ իրենք կնախաձեռնեն, որպեսզի կնքվի այդ ռազմավարական դաշինքը, Ռուստամյանը նշեց, որ դրա մասին խոսել են Արցախի նախագահի և վարչապետի հետ: «Պարզապես պայմանավորվել ենք ժամանակի հետ` ճանապարհային քարտեզի հետ կապված նախնական համաձայնություններ ունենալուց հետո, այս գործընթացը նախաձեռնել, դրա համար կարծում եմ, որ այս փուլում ճիշտ չի լինի, որ մենք ավելի մանրամասների մեջ մտնենք: Ես հուսով եմ, որ այդ գործը կկատարենք համախորհուրդ»,- եզրափակեց նա: