Թալիշում սպանված Խալափյանների որդին Երևանում է. տան խնդիր ունեն

Թալիշում հակառակորդի կողմից դաժանաբար սպանված Խալափյանների ընտանիքի զավակը` Գագիկ Խալափյանն այս պահին Երևանում է: Խալափյանն ունի 6 երեխա:

Yerkir.am-ի հետ զրույցում Խալափյանը նշեց, որ վերադարձել է Երևան, քանի որ այստեղ բարեկամներ ունեն և երեխաները նրանց մոտ են մնում:

«Չգիտեմ ինչ անել, բայց հետ վերադառնալ չեմ ուզում` հիշողությունները շատ դաժան են: Եթե Թալիշում չպետք է ապրեմ, հիմա Ղարաբաղում չեմ ուզում ապրել»,-ասում է Խալափյանը:

Նա տեղեկացրեց, որ Թալիշում «Թալիշ» բարեգործական ընկերությունում է աշխատել, օրվա ապրուստի գումարը կարողացել է վաստակել:  «6 երեխա ունեմ` 6-13 տարեկան, նրանց պահել է պետք: Ուզում եմ երեխեքի մեջից նախ վախը հանեմ, հիմա վերադառնալ չեմ ուզում: Տուն չունենք այստեղ, տան խնդիրը պետք է լուծեմ, բայց չգիտեմ ոնց` հույսս Աստված է»,-ասում է Խալափյանը:

Նա տեղեկացրեց նաև, որ ծնողներին հուղարկավորել է Ականաբերդում` այնտեղ բարեկամներ ունեին.«Չգիտեմ, է, ոչինչ չգիտեմ… Ծնողներս անգամ իրենց հայրական հողում չթաղվեցին: Հիմա միակ խնդիրս երեխեքիս անվտանգության հարցն է, որ տուն ու աշխատանք գտնեմ` լավ  կլինի»:

Հ.Գ. Գագիկ Խալափյանին օգնելու համար բացվել է հաշվեհամար: