ՏՄՊՊՀ, ՀԾԿՀ, ՎՊ եւ ՀՌԱՀ նախագահների` կուսակցական չլինելու մասին հարցը կքննարկվի ԱԺ լիագումար նիստում

Այսօր ԱԺ պետա-իրավական հարցերի մշտական հանձնաժողովում քննարկվում էր ԱԺ պատգամավոր Էդմոն Մարուքյանի ներկայացրած նախագիծը, որով պատգամավորն առաջարկում է` ՏՄՊՊՀ, ՀԾԿՀ, ՎՊ եւ ՀՌԱՀ նախագահները չեն կարող լինել կուսակցականներ:

Արդարադատության նախարար Արփինե Հովհաննիսյանն ու ԱԺ պետա-իրավական հարցերի մշտական հանձնաժողովի նախագահ, ՀՀԿ պատգամավոր Հովհաննես Սահակյանը հայտարարեցին, որ դեմ են այս նախագծին, իսկ ընդդիմադիր խմբակցությունների պատգամավորները կողմ արտահայտվեցին:

Էդմոն Մարուքյանն իր եզրափակիչ ելույթում հայտարարեց, որ այսօր վստահության լուրջ խնդիր կա` պետական մարմինների հետ կապված, մասնավորապես` պետական մարմինները բողոքում են, որ քաղաքացին չի դիմում իրենց, ու դրա համար վարույթ չեն կարողանում հարուցել այս կամ այն հարցի վերաբերյալ: Պատգամավորը բարձրաձայնեց մենաշնորհների մասին, որ այսօր անգամ մանկական պամպերս ներմուծելը խնդիր է:

Արդարադատության նախարար Արփինե Հովհաննիսյանը հարցրեց` հարցը կլուծվի, եթե ՀՀԿ կրծքանշանը հանե՞ն: «Ինչո՞ւ չէ, այո»,- հակադարձեց Էդմոն Մարուքյանը՝  նախագծին դեմ արտահայտվող պատգամավորներին հիշեցնելով Սերժ Սարգսյանի՝ փետրվարի 2-ի ելույթը, որում նա նաև այդ կետերին է անդրադարձել:

Նախագիծը դրվեց քվեարկության և ընդունվեց: Էդմոն Մարուքյանի նախագիծը մտավ ԱԺ լիագումար նիստերի օրակարգ: