Վաղը Եվրախորհրդարանի լիագումար նիստում կքննարկվի Լեռնային Ղարաբաղի հարցը

Եվրախորհրդարանի լիագումար նիստում քննարկվելու է Լեռնային Ղարաբաղի հարցը: Եվրախորհրդարանի պաշտոնական կայքի համաձայն` ապրիլի 12-ի օրակարգում ներառված է Եվրահանձնաժողովի փոխնախագահ, ԵՄ արտաքին քաղաքականության և անվտանգության հարցերով բարձր ներկայացուցիչ Ֆեդերիկա Մոգերինիի հայտարարությունը Լեռնային Ղարաբաղի հակամարտության վերաբերյալ:

ՀՅԴ Եվրոպայի Հայ դատի հանձնախմբի հաղորդակցության պատասխանատու Պետո Դեմիրճյանը Yerkir.am-ի հետ զրույցում  հայտնեց, որ լիագումար նիստի օրակարգում ներառված է 8 հարց, և ԼՂՀ հակամարտությանը վերաբերող հարցն օրակարգի 5-րդ հարցն է:

«ԼՂՀ հակամարտության հարցը քննարկվելու է վերջին օրերին ղարաբաղա-ադրբեջանական սահմանին տեղի ունեցած դեպքերի կոնտեքստում: Լիագումար նիստը կսկսվի Երևանի ժամանակով ժամը 17:00-ին, և, ամենայն հավանականությամբ, ԼՂՀ-ին վերաբերող հարցի քննարկումը կմեկնարկի մոտավորապես 20:00-ին»,- ասաց Դեմիրճյանը:

Նշենք, որ լիագումար նիստին ներկա է լինելու նաև ՀՅԴ Եվրոպայի Հայ դատի հանձնախումբի ղեկավար Գասպար Կարապետյանը: