Սահմանադրական բարեփոխումների նախնական տարբերակում անհասկանալի կետեր կան. ՀՀԿ-ական

Հուլիսի 15-ին սահմանադրական բարեփոխումների մասնագիտական հանձնաժողովի քարտուղարությունը հրապարակել է Սահմանադրության 1-7 գլուխների նախագծի նախնական տարբերակը:

 ՀՀԿ-ական պատգամավոր Սուքիաս Ավետիսյանը Yerkir.am-ի հետ զրույցում  հայտարարեց, որ հրապարակված գլուխներում կան կետեր, որոնք իր համար անհասկանալի են:

«Ինձ համար որոշակի հարցականներ մնացին հատկապես այնտեղ, որտեղ խոսվում է  մարդու իրավունքների մասին: Այդտեղ ահագին բաներ կան, որոնք անհասկանալի են, և ես փորձել եմ իրավաբանների հետ որոշ բաներ  քննարկել, հասկանալ և  հնարավոր է նաև, որ առաջարկների տարբերակ ներկայացվի»,- ասաց Ավետիսյանը:

Պատգամավորը նշեց, որ ամբողջությամբ ծանոթացել է հրապարակված գլուխներին: Նա անդրադարձավ նաև Վենետիկի հանձնաժողովի` սահմանադրական բարեփոխումների նախագծով նախատեսված որոշ դրույթները վերանայելու առաջարկին:

«Վենետիկի հանձնաժողովը իր որոշակի եզրակացությունը, ուղղությունը տալիս է, բայց դե երկրները իրենք են որոշում` դրանք ընդունելի են, թե ընդունելի չեն»,- ընգծեց Ավետիսյանը:

Նա նշեց նաև, որ դեռևս չի կարող ասել` Սահմանադրության մյուս գլուխները երբ կհրապարակվեն:

«Ինչքան շուտ հրապարակվեն, այնքան լավ»,- ասաց պատգամավորը:

«Ինձ համար  հրապարակված տարբերակի ծավալը, որպես Սահմանադրություն, շատ է թվում և նաև որոշակի բաներ կան, որոնք անհասկանալի են և ես փորձել եմ իրավաբանների հետ քննարկել դրանք: Ո՞վ է ասում, որ սա իդեալական փաստաթուղթ է: Սա այն տարբերակն է, որի շուրջ քաղաքական կառույցները, քաղաքագետներն ու իրավաբանները  համապատասխան եզրակացություններ պետք է անեն»,- ասաց Ավետիսյանը: