Թուրքերը վաճառքի են հանել 300 տարվա հայկական եկեղեցին՝ նախնական 1,5 միլիոն դոլարով

Ուր է հասել Ցեղասպանության ժամանակ սկսված թալանը.գրում է քրդամետ Demokrathaber կայքը՝ տեղեկացնելով, որ Թուրքիայում հայկական հերթական եկեղեցին է վաճառքի հանվել: Համացանցում առևտրի համար նախատեսված կայքում թուրքերն այս անգամ էլ «գովազդել» են Բուրսայում կառուցված հայկական` 300 տարվա եկեղեցին:

Ըստ Demokrathaber-ի՝ եկեղեցու «սեփականատերը» նախնական պահանջում է 1,5 միլիոն դոլար:

Անշարժ գույքի գործակալության աշխատակից Թայֆուն Օզենգինլերը նշել է, որ վաճառքի հանված հայկական եկեղեցին նախկինում ծառայել է հայերին և հույներին: Նրա խոսքով՝ Սեթբաշը թաղամասը, ուր գտնվում է եկեղեցին, եղել է հայահոծ: «Բոլոր անկյուններում պատմության բույր կա: Եռահարկ եկեղեցին, որը զբաղեցնում է 512 քմ տարածքի 300 քմ-ը, մինչև 1980-ականները տարբեր նպատակներով է օգտագործվել, որից հետո լքված վիճակում է»,- ասել է նա:

Օզենգինլերը հայտնել է, որ եկեղեցու «սեփականատերը» ապրում է արտասահմանում, սակայն եկեղեցին ունի ևս երեք բաժնետեր: «Ես միայն նրանցից մեկի հետ զրուցելու առիթ եմ ունեցել»,- նշել է  նա:

1986 թվականին Բուրսայի հիմնադրամների տնօրինության կողմից որպես պատմական արժեք գրանցված եկեղեցին անմխիթար վիճակում է:

Ըստ Demokrathaber-ի՝ մինչև 1915-ը Բուրսայում և Բուրսային կից Իզնիքում, Ենիջեյում և Ենիքոյում եղել է հայկական ավելի քան 17 եկեղեցի:

Կայքը հիշեցնում է, որ Սուրբ Աստվածածին հայկական եկեղեցին 1980 թվականի սեպտեմբերի 12-ի ռազմական հեղաշրջումից հետո Թուրքիայի ղեկավարների հրահանգով քանդվել էր, տեղում կառուցվել էր «Սեթբաշը» դպրոցը, իսկ բռնագրավված հայկական մյուս եկեղեցիները 1915 թվականից հետո վաճառվել էին անհատների՝ քաղաքից դրանց շունչը ոչնչացնելու նպատակով: