Հայտնի են ՀՀ լավագույն դպրոցները. վարկանիշները պետք չէ սիրել, հավանել կամ չհավանել

Այսօր ՀՀ ԿԳ նախարար Արմեն Աշոտյանը ներկայացրեց հանրակրթական դպրոցների վարկանիշավորման գործընթացի արդյունքները:

Նա նշեց, որ ազգային վարկանիշավորման հանրակրթական համակարգը վերջին տարիներին ստեղծված և կատարելագործված գործիքներից մեկն է` հասարակության, մանկավարժության համար, որպեսզի չափելի, շոշափելի, արժանահավատ ստանդարտներով կարողանանք համեմատել համեմատելին:

«Դպրոցները շատ տարբեր են` կազմակերպաիրավական ձևով, կրթական ծրագրերով, աշակերտների թվով, աշխարհագրական տեսակետից, հետևաբար, մենք դպրոցները բաշխել ենք ըստ իրենց հիմնական չափանիշների և համեմատել ենք միևնույն խմբում եղած դպրոցները /ինչպես խոշոր քաղաքային, այնպես էլ գյուղական դպրոցները/: Խնդիրը չեմպիոնին հայտնաբերելը չէ, իրականում ախտորոշման խնդիր է դրված՝ եղած խնդիրները վեր հանելու»,- ասաց Աշոտյանը:

Նա նշեց, որ, բացի մայրաքաղաքային դպրոցներից, առաջատարների թվում են Շիրակի, Սյունիքի, Լոռու դպրոցները: Այնուամենայնիվ, առաջատար եռյակում են հայտնվել  Երևանի «Մխիթար Սեբաստացի» կրթահամալիր» հիմնական դպրոցը, Գյումրու Բայրոնի անվան թիվ 20 հիմնական դպրոցը և Երևանի Մ. Մանուշյանի անվան թիվ 48 հիմնական դպրոցը: Քաղաքային մեծ և միջին  հիմնական դպրոցներն են` Մխիթար Սեբաստացու անվան դպրոցը, Գյումրու Բայրոնի անվան թիվ 20  և Երևանի Միսաք Մանուշյանի անվան թիվ 48-ը: Քաղաքային մեծ և միջին միջնակարգ դպրոցների եռյակում են` Գորիսի Բակունցի անվան 1, Վանաձորի 18 և Մարալիկի թիվ 1 դպրոցները:

ԿԳ նախարարի խոսքով` այս տեղեկատվությունը կարևոր է շատերի համար`  ծնողների` հասկանալու համար դպրոցի ուժեղ և թույլ կողմերը, տնօրենների և մանկավարժների՝ որպեսզի հասկանան` որտեղ է դպրոցների խնդիրը կամ մրցակցային առավելությունը, ինչպես նաև նախարարության համար` լավագույններին խրախուսելու, բայց նաև մյուսներին աջակցելու ծրագիր մշակելու համար:

«Վարկանիշները պետք չէ սիրել, հավանել կամ չհավանել, պետք է քննարկել թե՛ արդյունքները, թե՛ մեթոդաբանությունը: Մենք չենք հավաքվել` ստեղծելու կատարյալ մեթոդաբանություն, քանի որ այդպիսին չկա էլ: Հայաստանի կրթական վարկանիշավորման համակարգի հիմքում երկու կարևոր բաղադրիչ կա` միջազգային փորձ և տեղայնացման հետ կապված գերակայություններ: Այս ամենը համադրելով` մենք չենք չափում բուհերում, օրինակ, Նոբելյան մրցանակակիրներ դասախոսո՞ւմ են, թե՞ ոչ, թեպետ դա միջազգային ստանդարտ է, որը Հայաստանում կիրառելու կարիք չկա, նույնը վերաբերում է նաև դպրոցներին»,- ասաց Աշոտյանը` հավելելով, որ կլինեն դժգոհողներ, բայց, վարկանիշից դժգոհելուց բաց,  պետք է խնդրի նրանց` դժգոհել նաև իրենց իսկ աշխատանքից` հասկանալու համար, թե ո՞ր ցուցանիշն է ավելի ցածր:

Լավագույն դպրոցներից` Վանաձորի թիվ 18 դպրոցի կազմակերպիչ Արմեն Իսահակյանը yerkir.am-ի հետ զրույցում նշեց, որ իրենք ջանք ու եռանդ չենք խնայում` երեխաներին բարձր որակի կրթություն մատուցելու համար: Ըստ նրա` մարզային դպրոցներն առավել քան պետք է կրթության որակի վրա շեշտը դնեն, որպեսզի երեխան մեծանալով ավելի հեշտ կարողանա իր տեղը գտնել աշխատաշուկայում` այդպիսով նաև երկրից չհեռանալու հարցը լուծելով:

«Գաղտնիք չէ, որ մարզային դպրոցներն ավելի մեծ ուշադրության կարիք ունեն, բայց ուրախությամբ պետք է նշեմ նաև, որ վերջին տարիներին այդ բացը լրացվում է: Ասում են` սերունդը փոխվել է, երեխան լավ չի սովորում, ես համաձայն չեմ, սերունդը չի փոխվել, սովորողը միշտ էլ սովորում է, պետք է համապատասխան պայմաններ ապահովել»,- ասաց Իսահակյանը:

Նա նշեց նաև, որ այժմ իրենց դպրոցում հիմնանորոգման աշխատանքներ են տարվում: Ճիշտ է, ցրտերի պատճառով վերանորոգումը ձգձգվում է, բայց կարևորը` հետո կունենան մաքուր դասասենյակներ: «Վերանորոգմանը զուգահեռ` լուծվում է նաև ջեռուցման խնդիրը: Կուզեի միայն` ատեստավորումներն ավելի հաճախ լինեն, որպեսզի թացը չորից տարբերվի»,- ասաց Իսահակյանը: 

Ի դեպ, պետական տարրական և ոչ պետական հիմնական դպրոցների վարկանիշավորում չի կատարվել` դրանց սակավաթվության պատճառով: Վարկանիշավորումն իրականացրել է Կրթական տեխնոլոգիաների ազգային կենտրոնը: