Կոալիցիայի հավանականությունը փոքր է. ԲՀԿ-ական պատգամավոր

2016-ի առանձնահատկությունն այն է, որ նախընտրական տարին է լինելու` քաղաքական կուսակցությունները պետք է ներկայացնեն իրենց ծրագրերն ու հավակնությունները` 2017-ին խորհրդարանում տեղ զբաղեցնելու համար. այսօր լրագրողներին ասաց ԱԺ ԲՀԿ խմբակցության պատգամավոր Միքայել Մելքումյանը:

Պատգամավորի խոսքով` փետրվարից սկսվելու են ընտրական նոր օրենսգրքի վերաբերյալ քննարկումները: «Միանգամից ասեմ, որ որևէ նախագիծ ընտրական օրենսգրքի վերաբերյալ այս պահին դեռ չկա: Ընդամենը մոտեցումներ կան 4 հիմնական ուղղությունների վերաբերյալ: Առաջինը` ընտրությունների թափանցիկության վերաբերյալ` էլեկտրոնային քվեարկության միջոցով, որտեղ կարևորվում է ծրագրային անվտանգության ապահովումը, որպեսզի որևէ մարդկային միջամտություն չլինի քվեարկությանը: Երկրորդը` ընդհանուր ընտրական համակարգի վերաբերյալ մոտեցումն է` սկսած ընտրական հանձնաժողովների ձևավորումից մինչև վստահված անձինք, դիտորդներ, քվեաթերթիկների ամփոփում և այլն: Երրորդ մոտեցումը վարկանիշային քվեարկությունն է և ընտրատարածքների ձևավորման առանձնահատկությունը: Եվ չորրորդ հիմնական մոտեցումը ապագա կոալիցիայի ձևավորման սկզբունքներն են, թե ի՞նչ պարագայում, ի՞նչ սկզբունքներով պետք է ձևավորվի կոալիցիան, որպեսզի կայուն մեծամասնության ռիսկերը նախօրոք հնարավոր լինի գնահատել»,- ասաց Միքայել Մելքումյանը:

Ըստ նրա` ԲՀԿ-ն, բնականաբար, ակնկալում է, որ կհայտնվի խորհրդարանում` որպես երկրորդ քաղաքական ուժ: Պատգամավորը կարծիք հայտնեց, որ արտախորհրդարանական նորահայտ քաղաքական ուժերը չեն հայտնվի հաջորդ ընտրություններին խորհրդարանում, թեև արդեն հավակնություններ են ներկայացնում:

Լրագրողների հարցին, թե արդյո՞ք ԲՀԿ-ն կոալիցիայի մաս կդառնա մինչև 2017-ը, Միքայել Մելքումյանը պատասխանեց, որ կոալիցիայի հավանականությունը փոքր է, սակայն չբացառեց ինչ-որ համագործակցություն:

«ԲՀԿ-ն և ՀՅԴ-ն  սահմանադրական փոփոխություններին ասել են «այո»: ԲՀԿ-ն բյուջեին կողմ է քվեարկել: Իհարկե, մենք ընդդիմություն ենք և ասում ենք, որ մենք «հրաժարական» գոռացող ընդդիմություն չենք, բայց այս ամենը չի նշանակում, որ մենք կոալիցիայի մեջ պետք է լինենք: Ի՞նչ եք կարծում, կուսակցությունները կցանկանա՞ն վերցնել պատասխանատվություն կառավարության գործունեության ծանր տնտեսական տարվա համար ու մտնել կոալիցիա: Այս պահին կոալիցիայի խնդիր չկա, եթե մենք հաճախակի հանդիպումներ ենք ունենում վարչապետի հետ, տնտեսական հարցեր ենք քննարկում, դա չի նշանակում, որ վաղը կոալիցիա ենք կազմելու»,- ասաց պատամավորը` հավելելով, որ պետք է սպասել նոր ընտրական օրենսգրքի ընդունմանը: